Ташкент қаласында БҰҰ Балалар қоры (ЮНИСЕФ) және ЕҚЫҰ-ның Өзбекстандағы жобалар үйлестірушісімен бірлесе ұйымдастырылған Орталық Азия мемлекеттері Балалар омбудсмандарының алғашқы халықаралық форумы өз жұмысын бастады.
«Орталық Азия мемлекеттерінде бала құқықтарын қорғау тетіктерін жетілдірудің өзекті мәселелері: балалар омбудсмандарының өңірлік ынтымақтастық перспективалары» тақырыбындағы бұл халықаралық жиынға Қазақстан, Қырғызстан, Тәжікстан және Түркіменстанның балалар омбудсмандары, сондай-ақ Финляндия, Норвегия, Хорватия сияқты Еуропа елдерінің балалар омбудсмандары мен Еуропа Балалар омбудсмандары желісінің (ENOC) өкілдері қатысуда.
Сонымен қатар, форум жұмысына Өзбекстанның Олий Мажлис палаталарының мүшелері, жауапты мемлекеттік органдар, үкіметтік емес ұйымдар мен БАҚ өкілдері қатысып отыр.
[gallery-25249]
Форумның ашылуында Өзбекстан Сенатының Төрайымы Танзила Нарбаева мен Балалар омбудсманы Сурайё Рахмонова сөз сөйлеп, Президент Шавкат Мирзиёев басшылығымен жүргізіліп жатқан адам құқықтарын қорғау мен әлеуметтік қорғау саясаты балалар өмірінде нақты көрініс тауып отырғанын атап өтті.
Әрбір балаға қамқорлық пен назар аударумен қатар, бұл бағыттағы халықаралық байланыстар да жүйелі түрде жолға қойылған. ЮНИСЕФ-пен Өзбекстанның ынтымақтастығы нығайып келеді. Өзара әріптестік аясында көптеген қайырымды істер жүзеге асырылды. Балалар тап болатын күрделі жағдайларды мемлекетаралық ынтымақтастық арқылы шешу бойынша бірлескен жұмыстар жүргізілуде.
ЮНИСЕФ-тің Өзбекстандағы өкілі Рехина Кастийо атап өткендей, ЮНИСЕФ бүкіл әлемде балалардың мүдделерін қорғаумен айналысады және қай елде қолдау тапса, сол жерде тиімді нәтижелерге қол жеткізеді. Өзбекстан билігінің тұрақты қолдауының арқасында бұл жерде көптеген маңызды жобалар жүзеге асырылды. Өзбекстан тәуелсіздік алғаннан кейін қабылдаған алғашқы халықаралық құжаттардың бірі – Бала құқықтары туралы конвенция болды. Өзбекстан үкіметі тек ел ішінде ғана емес, сонымен қатар шетелде қиын жағдайға тап болған балалардың мүддесін қорғауға ерекше назар аударып, оларды елге қайтаруда. Сондай-ақ, түрлі дағдарыстар салдарынан азап шеккен шетелдік балалар да қорғауға алынуда.
Форумда Өзбекстан Балалар омбудсманының өзге мемлекеттердің омбудсман құрылымдарымен тиімді байланыс орнатып келе жатқаны айтылды. Атап айтқанда, Орталық Азия елдері Балалар омбудсмандарының тығыз ынтымақтастығы нәтижесінде әлеуметтік қиын жағдайға тап болған балаларды шетелден елге қайтару, олардың бұзылған құқықтарын қалпына келтіру, әлеуметтік қызмет көрсету, қажетті құжаттарды рәсімдеу, қамқоршылыққа алу және басқа да күрделі жағдайлар бойынша нақты жұмыстар атқарылуда.
Шара барысында, Өзбекстан Орталық Азия елдерінің Балалар омбудсмандары арасындағы өңірлік диалог алаңын құру бастамасын көтерді.
Аталған форумның негізгі мақсаты – балаларды қорғау саласындағы тиімді тәжірибе алмасу, ортақ мәселелерді оңтайлы шешу, өңірлік және трансшекаралық қауіп-қатерлерге қарсы ортақ тәсілдер қалыптастыру мақсатында Орталық Азия елдері Балалар омбудсмандары арасында өзара іс-қимылдың нәтижелі өңірлік алаңын құру.
Екі күнге созылатын халықаралық форум аясында бала құқықтарын қамтамасыз етудің өзекті мәселелеріне арналған пленарлық сессиялар өтеді. Жиын соңында бала құқықтарын қорғау және қамтамасыз ету саласында Орталық Азияда өңіраралық және халықаралық ынтымақтастықты одан әрі нығайту мақсатында Орталық Азия елдері Балалар омбудсмандары форумының Декларациясы қабылданатын болады.
суреттерді түсірген Р.Назарматов, ӨзА