Өзбекстанда зауыттан шыққанына 50 жыл және одан да көп уақыт өткен автокөлік құралдарын пайдалануға тыйым салынады. Бұл жөнінде Министрлер Кабинетінің «Жол қозғалысы қауіпсіздігін қамтамасыз ету саласын цифрландыру бойынша қосымша шаралар туралы» қаулысы қабылданды.

Қаулыға сәйкес, Қоғамдық қауіпсіздік департаментіне қарасты Жол қозғалысы қауіпсіздігі қызметінің ақпараттық жүйесіндегі «Әкімшілік іс жүргізу» модулі жауапты министрліктер мен ведомстволардың ақпараттық жүйелерімен интеграцияланады.

2026 жылғы 1 ақпаннан бастап жалпы салмағы (жүкпен бірге) 44 тоннадан асатын жүк автокөліктері, кен орындары, шахталар мен карьерлерде пайдаланылатын арнайы техника, заңды тұлғаларға тиесілі бағытсыз таксилер, сондай-ақ «антикварлық» авто-мотокөліктер үшін жеке сериялы мемлекеттік тіркеу нөмір белгілері енгізіледі.

Сонымен қатар, өндірілгеніне 50 жыл және одан да көп уақыт өткен көлік құралдарын пайдалануға және қайта тіркеуге тыйым салынып, мұндай көліктер мемлекеттік тіркеуден шығарылады. Бұл талаптар жол қозғалысы қауіпсіздігін арттыруға және техникалық тұрғыдан ескірген көліктердің санын азайтуға бағытталған.

Жаңа тәртіпке сәйкес, авто-мотокөлік құралын тіркеу туралы куәлікте меншік иесінің тұрғылықты мекенжайын көрсету талабы алынып тасталады. Ал көлік құралдарын мемлекеттік тіркеу кезінде сатып алу-сату шарттары, электрондық аукцион хаттамалары, мемлекет үлесі бар кәсіпорындар өндіретін көліктерге қатысты электрондық есеп құжаттары, сондай-ақ көлік иесі туралы мәліметтер ведомствоаралық электрондық өзара іс-қимыл арқылы алынады.

Бұл жаңашылдықтар тіркеу рәсімдерін жеңілдетіп, цифрлық қызметтердің тиімділігін арттыруға мүмкіндік береді. Сондай-ақ қабылданған шаралар экологиялық қауіпсіздікті күшейтіп, елдегі көлік паркінің жаңаруына серпін бермек.