Өзбекстан мен Қазақстан әлеуметтік қорғау саласындағы ынтымақтастықты кеңейтеді
Әлеуметтік қорғау саласындағы тәжірибе алмасу мен өзара ықпалдастық Өзбекстан мен Қазақстан арасындағы байланыстың маңызды бағыттарының біріне айналып отыр.
Осыған орай Өзбекстан Ұлттық әлеуметтік қорғау агенттігінің директоры Мансурбек Оллояров Қазақстанның Өзбекстандағы Төтенше және Өкілетті елшісі Ералы Тоғжановпен кездесті.
Кездесу барысында екі елдің әлеуметтік қорғау саласындағы ынтымақтастығын дамыту, тәжірибе алмасу және практикалық байланысты кеңейту мәселелері талқыланды.
Тараптарға Өзбекстанда отбасыға бағдарланған әлеуметтік қорғау жүйесін дамыту, адамды отбасынан және қоғамнан оқшауламай қолдау, сондай-ақ махалланың әлеуметтік қорғаудағы рөлін күшейту бағытында атқарылып жатқан жұмыстар таныстырылды.
Сонымен қатар, мүгедектігі бар адамдар мен әлеуметтік қорғауды қажет ететін азаматтарды қолдау бойынша тәжірибе алмасу, сарапшылар кездесулерін өткізу және өзара сапарлар ұйымдастыру мәселелері қаралды.
Кездесу соңында екі елдің әлеуметтік қорғау саласындағы ынтымақтастығын одан әрі нығайтып, оны жүйелі түрде дамыту жөнінде келісімге қол жеткізілді.
