Өзбекстан мен Қазақстан архив саласындағы ынтымақтастықты жаңа деңгейге көтеруде
Астана қаласында Өзбекстан Республикасы Әділет министрлігіне қарасты «Узархив» агенттігі мен Қазақстан Республикасы Президентінің архиві арасында архив ісі және құжат айналымы саласындағы ынтымақтастықты дамытуға бағытталған өзара түсіністік туралы меморандумға қол қою рәсімі өтті.
Құжат екі елдің архив мекемелері арасындағы өзара тиімді әріптестікті нығайтуға, тәжірибе алмасу тетіктерін жетілдіруге және архив ісін заманауи талаптарға сай дамытуға жол ашады. Сонымен қатар меморандум архив құжаттарын сақтау, пайдалану, ғылыми зерттеулерді қолдау және салаға инновациялық технологияларды кеңінен енгізу бағытындағы ынтымақтастықтың жаңа мүмкіндіктерін айқындайды.
Рәсім барысында тараптар архив саласында жүзеге асырылып жатқан реформалар, цифрландыру үдерістері, ұлттық архив қорларын сақтау және оларды тиімді пайдалану мәселелері жөнінде пікір алмасты. Тарихи құжаттық мұраны көздің қарашығындай сақтап, келер ұрпаққа аман жеткізу бүгінде халықаралық ынтымақтастықты қажет ететін маңызды міндеттердің бірі екені атап өтілді.
Кездесуден кейін өткен екіжақты келіссөздер барысында архив құжаттарын цифрландыру, электронды қорлар қалыптастыру, цифрлық архив технологияларын енгізу, мамандардың біліктілігін арттыру мен тағылымдамалар ұйымдастыру мәселелері жан-жақты талқыланды. Сондай-ақ бірлескен ғылыми-тәжірибелік конференциялар, семинарлар және дөңгелек үстелдер өткізу жөніндегі бастамалар қарастырылды.
Бұдан бөлек, тарихи маңызы бар құжаттарды анықтау, оларды ғылыми айналымға енгізу, архив қорларындағы мәліметтерді тиімді пайдалану, сондай-ақ архив қызметінде заманауи ақпараттық-коммуникациялық технологиялар мен жасанды интеллект мүмкіндіктерін қолдану бағытындағы ынтымақтастық перспективалары сөз болды.
Келіссөздер соңында тараптар өзара тиімді әріптестікті жүйелі түрде дамытуға, тәжірибе алмасу бағдарламаларын іске қосуға, бірлескен жобаларды жүзеге асыруға және архив саласы мамандары арасындағы кәсіби байланысты кеңейтуге уағдаласты.
Аталған меморандумның қабылдануы Өзбекстан мен Қазақстанның архив мекемелері арасындағы ынтымақтастықты жаңа белеске шығарып, тарихи құжаттық мұраны сақтау мен зерттеу мүмкіндіктерін кеңейтеді. Сонымен қатар бұл қадам екі бауырлас ел арасындағы мәдени-гуманитарлық байланыстарды одан әрі нығайтуға ықпал етеді.
