Өзбекстан мен Гонконг арасында 30 күндік визасыз режим енгізіледі
Өзбекстан мен Гонконг азаматтары үшін 30 күнге дейінгі мерзімге өзара визасыз жүйені енгізу жоспарланып отыр.
Бұл туралы Өзбекстан Республикасының Сыртқы істер министрі Бахтиёр Саидов мәлімдеді.
Министрдің мәліметіне сәйкес, Ташкентте Гонконг арнайы әкімшілік ауданы әкімшілігінің басшысы Джон Ли Каччиумен ресми кездесу өтіп, осы келіссөздер барысында тараптар екі ел арасында инвестиция тарту, қаржы секторы, цифрландыру үдерістері, жасанды интеллект технологиялары, сондай-ақ көлік пен логистика сияқты маңызды салалардағы ынтымақтастық перспективаларын талқылаған.
«Кездесу барысында Гонконгтің ірі халықаралық қаржы және бизнес орталығы ретіндегі бай тәжірибесі Өзбекстан экономикасын жаңа деңгейге көтеруге және заманауи жобаларды жүзеге асыруға елеулі үлес қоса алатыны атап өтілді», делінген хабарламада.
Келіссөздер соңында екі тарап өкілдері өзара визасыз режимді ресми түрде енгізу жөніндегі үкіметаралық келісім жасау ниетін білдіретін ноталармен алмасты. Министр Бахтиёр Саидовтың айтуынша, бұл қадам екі ел азаматтары үшін қосымша мүмкіндіктер ашып, туризм мен іскерлік байланыстарды одан әрі жандандыруға айтарлықтай ықпал етеді.
