Өзбекстан мен Ауғанстан транзит және логистика саласындағы ынтымақтастықты кеңейтеді
Өзбекстан Республикасының Көлік министрі Илхам Махкамов Ауғанстанның Сауда және инвестициялар палатасының төрағасы Мұхаммад Карім Хашимимен кездесу өткізді.
Кездесуде Өзбекстан мен Ауғанстан арасындағы транзит және логистика саласындағы ынтымақтастықты одан әрі кеңейту мәселелеріне назар аударылды.
Сондай-ақ, тараптар жүк тасымалы көлемін арттыру, логистикалық үдерістерді тиімді ұйымдастыру және сауда байланыстарын нығайту жөнінде пікір алмасты. Сонымен қатар, Өзбекстан мен Ауғанстанның қолданыстағы транзиттік мүмкіндіктерін кеңінен пайдалану жолдары қарастырылды.
Келіссөз барысында Ауғанстан импорты мен Өзбекстан экспорты бойынша жүктерді жеткізу мерзімін қысқарту, қойма инфрақұрылымын дамыту, сондай-ақ Хайратон және Найбабад станцияларына жалғасатын қосымша теміржол желілерін салу мәселелеріне айрықша назар аударылды.
Бұдан бөлек, Ауғанстан жүктерінің Өзбекстан аумағы арқылы өтетін транзит көлемін ұлғайту, сондай-ақ Қытай порттары мен Парсы шығанағы елдерінен келетін жүктерді Өзбекстанның көлік дәліздері арқылы тасымалдау рәсімдерін жеңілдету мүмкіндіктері талқыланды.
Кездесу барысында Ауғанстандағы сапаны бақылау зертханаларының желісін кеңейту және логистикалық компаниялардың қызметіне әсер етіп отырған кейбір көлік шығындарын қайта қарау мәселелері де көтерілді.
Мұндай бастамалар Орталық және Оңтүстік Азияны байланыстыратын халықаралық көлік дәліздерінің тиімділігін арттыруға мүмкіндік береді. Сонымен қатар жаңа инфрақұрылымдық жобалардың жүзеге асуы өңірдің транзиттік әлеуетін күшейтіп, кәсіпкерлер үшін қолайлы жағдай қалыптастыруға ықпал етеді.
Кездесу соңында Ауғанстан тарапы тиісті ұйымдармен бірлесе отырып, бар мәселелерді шешуге және транзитті, логистиканы әрі өңірлік сауданы дамытуға бағытталған бірлескен жобаларды жүзеге асыруға дайын екенін мәлімдеді.
