Биыл 12 наурызда Өзбекстан Президенті Шавкат Мирзиёевтің Францияға жасаған мемлекеттік сапары аясында маңызды тарихи құжатқа – Өзбекстан – Франция университетін құру туралы үкіметаралық келісімге қол қойылған еді. Бұл келісім екі ел арасындағы ұзақ мерзімді стратегиялық серіктестіктің нақты көрінісіне айналып, жаңа оқу ордасын іске асыруға берік құқықтық негіз қалады.
Осы маңызды бастама аясында Өзбекстан Ұлттық университетінде «Өзбекстан – Франция университеті: келешегі және дамуы» атты халықаралық форум ұйымдастырылды. Форумда университеттің тұжырымдамасы мен оның даму бағыттары кеңінен талқыланды. Атап айтқанда, бірлескен білім беру бағдарламаларын әзірлеу, заманауи оқыту әдістемелерін енгізу, практикалық бағыттағы оқыту моделін жолға қою мәселелеріне ерекше назар аударылды.
Жаңа университет өз жұмысын 2025 жылдың 1 қыркүйегінен бастайды. Алғашқы кезеңде гуманитарлық ғылымдар факультеті ашылып, «Француз тілі және әдебиеті» мамандығы бойынша магистратура бағдарламасы іске қосылады. Болашақта университет базасында биоинформатика мен жаңартылатын энергия көздеріне бағытталған инженерлік факультет, сондай-ақ интеллектуалды көлік логистикасы мен жүйелері бойынша көлік факультеті құрылуы жоспарланған.
Форумда француз тарапынан жұмыс беруші компаниялармен тығыз ынтымақтастық орнату, дуалды білім беру моделін сынақтан өткізу, жасыл энергетика, цифрландыру, жасанды интеллект және BIM-технологиялар сынды салаларды оқыту мазмұнына басым бағыт ретінде енгізу мәселелері де көтерілді.
Келешектегі серіктестіктің нақты бағыттары ретінде мына бастамалар белгіленді:
- қос диплом беретін бірлескен білім беру бағдарламаларын іске қосу;
- француз профессорларын Өзбекстан университеттеріне дәріс оқуға шақыру;
- өзбек оқытушыларын Францияда тағылымдамадан өткізу;
- бірлескен ғылыми мақалалар мен жобалар әзірлеу;
- студенттер мен оқытушылар арасында академиялық алмасу бағдарламаларын дамыту.
Бұл форум — Өзбекстан мен Франция арасындағы білім беру саласындағы стратегиялық серіктестіктің жаңа кезеңге өткені мен елдің жоғары білім жүйесін интернационалдандырудағы маңызды қадамының айғағы. Жаңа университет – жас буынға жаңа мүмкіндік, ал екі ел үшін – ортақ болашаққа салынған сенімді көпір болмақ.