Өзбекстан мен Қытай экология, қоршаған ортаны қорғау және климаттың өзгеруі саласында ынтымақтастық орнатты.

Экология министрлігінің хабарлауынша, Қытайдың құмды дауылдар мен шөлдерді бақылау жөніндегі ұлттық кеңесінің төрағасы Ан Фендзидің Самарқандта өткен БҰҰ-ның шөлейттену жөніндегі конвенция комитетінің 21-ші сессиясына қатысуы өзара ынтымақтастықты нығайтудағы маңызды қадам болды.

Ан Фендзи мен Экология министрі Азиз Абдухакимов арасындағы кездесуде Өзбекстанның шаң мен құмды дауыл қаупі жоғары аймақтарында жердің деградациясы және жерді тұрақты басқару мәселелері бойынша зерттеулер жүргізу, тәжірибе алмасу, бірлескен ғылыми-зерттеу іс-шараларын жүзеге асыру мәселелері талқыланды.

«Кездесу соңында шөлейттену және жердің деградациясымен күресу саласындағы ғылыми-тәжірибелік ынтымақтастық туралы меморандум әзірлеп, қол қою арқылы жақын арада тығыз ынтымақтастық орнату туралы келісімге қол жеткізілді», делінген хабарламада.

Қытай құнарлы топырақты табиғаттың жағымсыз әсерінен қорғауға көмектесетін экологиялық жобаларды жүзеге асыруда жетекші елдердің бірі болып табылады. Сондай-ақ оның шөлейттенумен күресу және экожүйені қалпына келтіруде үлкен тәжірибесі бар. Кейінгі 10 жылда «Үш солтүстік» жобасы аясында орман алқаптары 33,3 миллион гектардан астамға ұлғайған.