Ёшларнинг экологик лойиҳалари таҳлил қилинди
"Яшил ташаббуслар" жамғармаси ҳамда Халқаро экологик ёшлар қўмитаси ҳамкорлигида Халқаро шахмат мактабида “Яшил келажак” оромгоҳи ташкил этилди.
5 кун давомида ўтказилган оромгоҳда “Экологик ижтимоий лойиҳалар” танлови ғолиблари ҳамда Халқаро экологик ёшлар қўмитасининг ҳудудий координаторлари иштирок этди.
Улар учун экологик лойиҳаларни самарали ишлаб чиқиш ва амалга ошириш, замонавий коммуникация воситаларидан фойдаланиш ҳамда профессионал кўникмаларни ривожлантиришга қаратилган тренинг ва маҳорат дарслари ташкил этилди.
Амалий машғулотларда Наргис Қосимова, Нодира Алимова ва Ферузбек Сайфуллаев эксперт ва спикер сифатида иштирок этиб, ўз тажриба ва билимлари билан бўлишди. Ғолиб деб топилган 35 та экологик ижтимоий лойиҳа жами 700 миллион сўмлик грант ваучерлари билан қўллаб-қувватланди.
Шунингдек, Халқаро ёшлар экологик қўмитаси ҳудудий координаторларининг I қурултой йиғилиши бўлиб ўтди ва уларнинг фаолияти таҳлил қилинди.
Қайд этилганидек, мазкур ташаббус ёшларнинг экологик муаммоларга ижтимоий лойиҳалар орқали ечим таклиф этиши, ўз ғояларини мустақил ишлаб чиқиши ва амалиётга татбиқ этиши, шунингдек, замонавий медиа ва коммуникация кўникмаларини ривожлантиришига хизмат қилади.
Гулноза Бобоева, ЎзА
