Yevropa tiklanish va taraqqiyot banki O‘zbekiston ipoteka bozoriga 50 million dollar yo‘naltiradi
O‘zbekiston ipoteka bozorini rivojlantirish va aholining uy-joyga bo‘lgan ehtiyojini qondirish borasida yana bir muhim qadam tashlandi. «O‘zbekiston ipotekani qayta moliyalashtirish kompaniyasi» aksiyadorlik jamiyati hamda Yevropa tiklanish va taraqqiyot banki o‘rtasida 50 million AQSH dollari ekvivalentida milliy valyutada to‘g‘ridan-to‘g‘ri qarz mablag‘larini jalb qilish bo‘yicha strategik kelishuv imzolandi.
E’tiborli jihati shundaki, mazkur moliyaviy resurslar davlat kafolatisiz jalb qilinmoqda. Bu esa kompaniyaning xalqaro moliya institutlari oldidagi ishonchli imiji va moliyaviy barqarorligini yana bir bor namoyon etmoqda.
Kelishuv doirasida jalb etiladigan mablag‘lar tijorat banklari tomonidan aholiga ajratilayotgan ipoteka kreditlarini qayta moliyalashtirishga yo‘naltiriladi. Xususan, xotin-qizlarga ajratiladigan ipoteka kreditlarini qo‘llab-quvvatlash ham ustuvor yo‘nalishlardan biri sifatida belgilangan.
Bu banklarning uzoq muddatli resurs bazasini mustahkamlashga xizmat qilib, aholi uchun ipoteka kreditlarining ommabopligi va qulayligini oshirish imkonini beradi.
«O‘zbekiston ipotekani qayta moliyalashtirish kompaniyasi» bosh ijrochi direktori Murodjon Farmonovning ta’kidlashicha, mazkur kelishuv Yevropa tiklanish va taraqqiyot banki bilan hamkorlik doirasidagi navbatdagi muhim yutuq hisoblanadi.
Uning so‘zlariga ko‘ra, hamkorlikning kengayishi tijorat banklarini barqaror moliyaviy resurslar bilan ta’minlash, aholining uy-joyga bo‘lgan talabini qondirish va ipoteka kreditlari shartlarini yanada yaxshilashga xizmat qiladi.
Iqtisodchilarning qayd etishicha, xalqaro moliya institutlaridan davlat kafolatisiz mablag‘ jalb qilinishi mamlakat moliya bozori uchun muhim ijobiy signal hisoblanadi. Bu, bir tomondan, milliy ipoteka tizimiga bo‘lgan ishonch ortib borayotganini ko‘rsatsa, ikkinchi tomondan, uzoq muddatli moliyaviy resurslar hajmini kengaytirish imkonini yaratadi.
Shuningdek, milliy valyutada mablag‘ jalb qilinishi valyuta xavflarini kamaytirishga xizmat qiladi. Bu esa ipoteka bozori barqarorligi va aholi uchun moliyaviy xizmatlar sifatini oshirishda muhim ahamiyat kasb etadi.
Ekspertlarning fikricha, mazkur kelishuv nafaqat ipoteka bozorini rivojlantirish, balki mamlakatda uy-joy moliyalashtirish tizimini yanada takomillashtirish va xalqaro investorlar bilan hamkorlikni chuqurlashtirishga xizmat qiladi.
Yevropa tiklanish va taraqqiyot banki bilan imzolangan 50 million dollarlik kelishuv O‘zbekiston ipoteka bozori uchun muhim voqealardan biri bo‘lib, aholining uy-joy sharoitlarini yaxshilash, bank tizimining resurs bazasini mustahkamlash va mamlakat moliya sektoriga xalqaro ishonchni oshirishga xizmat qilishi kutilmoqda.
Shahnoza Mamaturopova, O‘zA
