Япониялик халқаро экспертлардан амалий машғулотлар
Оролбўйи халқаро инновация марказида дала консервацияси элементларига эга уруғларнинг генетик банкини яратиш ва самарали ишлаш масалаларига бағишланган семинар-тренинг бўлиб ўтди.
Тадбирда марказ ходимлари, ҳудудий қишлоқ хўжалиги маслаҳат хизматлари, давлат ташкилотлари ва фермерлар иштирок этишди. Ўқув машғулотларини ўсимликлар генетик ресурсларини сақлаш ва барқарор қишлоқ хўжалиги соҳасидаги етакчи халқаро экспертлар – Тоттори университети доктори Саюри Терамото ва Миэ университети доктори Кристина Тодеричлар олиб боришди.
Уч кун давом этган семинар давомида Оролбўйининг қурғоқчил ва шўрланган ерларида барқарор деҳқончиликни ривожлантириш учун юқори салоҳиятга эга бўлган ўсимликларнинг генетик ресурсларини, шу жумладан галофитлар ва кам фойдаланиладиган қишлоқ хўжалиги экинларини сақлаш, кўпайтириш ва улардан оқилона фойдаланиш бўйича замонавий ёндашувлар кўриб чиқилди.
Дастур иштирокчиларига уруғлик банкларини бошқариш, ўсимликларнинг генетик ресурсларини сақлаш ва кўпайтириш, дала консервациясини ташкил этиш, ихтисослаштирилган маълумотлар базаларини юритиш, шунингдек, уруғлик материалининг сифатини назорат қилиш ва самарали тақсимлашни таъминлаш бўйича касбий компетенцияларини ривожлантиришга қаратилган назарий ва амалий машғулотлар ўтказилди. Унда агробиологик хилма-хилликни сақлаш, озиқ-овқат хавфсизлигини мустаҳкамлаш ва иқлим ўзгариши шароитида қишлоқ хўжалиги ишлаб чиқаришига барқарор ёндашувларни жорий этиш масалаларига алоҳида эътибор қаратилди.
Тадбирнинг амалий қисми Оролбўйи халқаро инновация марказининг уруғлик генетик банкига ташриф буюришни ўз ичига олди. Унда иштирокчилар уруғлик коллекцияларни сақлаш ва бошқаришнинг амалдаги тизими, шунингдек, ўсимликларни дала шароитида сақлаш ва кўпайтиришнинг замонавий усуллари билан танишдилар.
Довуд Абибуллаев, ЎзА мухбири
