Янги лойиҳалар саноат ҳамкорлигини кенгайтирмоқда
Замонавий металлургияда рақобатбардошлик нафақат ишлаб чиқариш қувватлари, балки хомашёни чуқур қайта ишлаш, барқарор ресурс ва энергия таъминоти ҳамда самарали логистика тизимига ҳам боғлиқ. Шу сабабли, халқаро технологик ва инвестициявий ҳамкорликни кенгайтириш саноатни ривожлантиришнинг муҳим омилларидан бирига айланмоқда.
Хитой Халқ Республикасига хизмат сафари доирасида “Ўзметкомбинат” АЖ бошқаруви раиси Баҳодир Абдуллаев бошчилигидаги делегация “China North Industries Corporation” – “NORINCO” раҳбарияти билан музокара ўтказди.
Унда корхонанинг узоқ муддатли ривожланиш стратегияси доирасида минерал ресурсларни ўзлаштириш, хомашёни чуқур қайта ишлаш, илғор технологияларни жалб этиш ва барқарор ресурс базасини шакллантириш масалалари муҳокама қилинди.
Музокараларда техноген ресурслар таркибидаги қимматли компонентларни қайта ажратиб олиш, иккиламчи хомашёни ишлаб чиқариш айланмасига қайтариш ва бу жараёнларга замонавий технологияларни жорий этиш имкониятлари кўриб чиқилди.
Қайд этилганидек, йирик саноат лойиҳаларининг самарадорлиги ишлаб чиқариш қувватларигина эмас, балки уларнинг энергетика ва транспорт инфратузилмаси билан таъминланганига ҳам боғлиқ. Шу боис, музокараларда янги объектларни узлуксиз энергия билан таъминлаш, замонавий энергетик технологияларни жорий этиш, транспорт-логистика тизимини такомиллаштириш ҳамда хомашё ва тайёр маҳсулот ташиш жараёнларини оптималлаштириш бўйича ҳамкорлик имкониятларига аҳамият қаратилди.
Жамият ахборот хизматига кўра, “NORINCO” бу йўналишларда катта халқаро тажрибага эга корпорациялардан бири ҳисобланади. Компания кончилик ва минерал ресурслар, нефть-газ, энергетика, муҳандислик, транспорт инфратузилмаси, саноат ишлаб чиқариши ҳамда инвестиция лойиҳалари каби қатор соҳаларда фаолият юритади.
Н.Зиёдуллаева, ЎзА
