«Узатом» мен «Росатом» жобалық сараптама саласындағы ынтымақтастықты күшейтеді
22–23 шілде күндері «Узатом» агенттігі мен АЭС құрылысы дирекциясының делегациясы Мәскеу қаласына жұмыс сапарымен барып, атом энергетикасы саласындағы ынтымақтастықты кеңейтуге бағытталған бірқатар жұмыс кездесулерін өткізді.
Сапар аясында «Росатом» мемлекеттік корпорациясының күрделі құрылыс жөніндегі директоры Дмитрий Волковпен және Салалық күрделі құрылыс орталығының өкілдерімен келіссөздер ұйымдастырылды. Кездесу барысында Жызақ облысында салынып жатқан интеграцияланған атом электр станциясы жобасы үшін әзірленіп жатқан құжаттарды сараптамадан өткізу үдерісін ұйымдастыру мәселелері талқыланды.
Сондай-ақ жобалық құжаттаманы сараптамадан өткізу тәртібі, өзара ынтымақтастық тетіктерін жетілдіру және ұлттық мамандардың біліктілігін арттыру мәселелері бойынша пікір алмасылды.
Келіссөздердің қорытындысы бойынша сараптама үдерістерін үйлестіру үшін Өзбекстан мен Ресей мамандарынан тұратын бірлескен жұмыс тобын құру туралы келісімге қол жеткізілді. Жаңадан құрылатын топ жобалық құжаттарды қарау барысындағы ұйымдастырушылық мәселелерді жедел шешуге және екі тарап арасындағы ынтымақтастықты тиімді жолға қоюға ықпал етеді.
Сапар барысында делегация Атом өнеркәсібі құрылыс кешені ұйымдары қауымдастығының басшылығымен де кездесті. Онда қауымдастық құрамына кіретін компаниялардың Өзбекстандағы атом энергетикасы жобаларына қатысу мүмкіндіктерін кеңейту перспективалары талқыланды.
Бұдан бөлек, Венгрияның «MVM EGI Zrt.» компаниясының өкілімен өткен келіссөздер барысында екі ел арасындағы үкіметаралық келісімдерді іске асыру аясында құрғақ градирнялар салу бойынша жақын арада атқарылатын нақты іс-шаралар айқындалды.
Агенттік баспасөз қызметінің мәліметінше, Мәскеуде өткен бұл кездесулер мен келіссөздер Жызақ облысында салынып жатқан атом электр станциясы жобасын жүзеге асыру және халықаралық ынтымақтастықты одан әрі нығайту жолындағы маңызды қадамдардың бірі болды.
