Украинадаги 200 дан зиёд ёнилғи қуйиш шохобчасига зарар етган
Бу йил ёзда Россия кучлари Украинадаги юзлаб ёнилғи қуйиш шохобчасини йўқ қилиш учун дрон ва ҳаво бомбасидан фойдаланган. Бу ҳақда “Financial Times" Харьков вилояти кенгаши аъзоси Александр Скорикка таяниб ёзган.
Вайрон қилинган ёнилғи қуйиш шохобчаларидан камида 80 таси Харьков вилоятига қарашли.
Украина расмийлари сўнгги ҳафталарда ҳужум кетма-кетлиги ошганини таъкидлаган. Мақолада таъкидланганидек, Россия фронт чизиғидаги ҳудудларда логистикани бузиш, ижтимоий кескинликни кучайтириш ва одамларни кетишга мажбурлашга мойил. Бундан ташқари нашр Москва бу зарбаларни ўз нефть ва газ иншоотларига уюштирилган ҳужумга жавоб сифатида кўриши мумкинлигини ёзган.
Баъзи минтақалар расмийлари ҳаёт қийинлашаётгани, дўконларда нарх ошиши мумкинлиги, шу билан бирга “одамлар рақиб томон доимий равишда янги усуллар қўллашига кўникиб қолгани”ни таъкидлаган.
Нашр таъкидлашича, Харьковдан ташқари, ҳужум Полтава, Донецк, Днепропетровск ва Запорожье вилоятларига ҳам таъсир кўрсатган. Фронт чизиғидаги айрим ҳудудларда ёнилғи қуйиш шохобчаларини қалин бетон тўсиқ билан ҳимоя қилишга уринишлар кузатиляпти.
С.Раҳимов, ЎзА
