Трамп ва Путин яқинлашуви Европани ташвишга солмоқда (+видео)
“Euronews” хабар беришича, Дональд Трампнинг Владимир Путин билан яқинлашуви Европа ва АҚШ ўртасидаги келишмовчиликни кучайтирди. Шунга қарамай, Европа мамлакатлари ҳозирча АҚШ билан алоқани узиш ва мустақил йўлдан боришга тайёр эмас.
Россия ва Украина уруши масаласида Европа ва АҚШ ўртасидаги келишмовчилик янги босқичга чиқди. Трамп Путинга нисбатан хайрихоҳлигини очиқ намоён этишда давом этяпти. Кўҳна қитъа ва Америка алоқалари тобора заифлашиб бораётган бир пайтда бу ҳолат мавжуд ҳамкорликка жиддий путур етказиши мумкин.
Атиги икки ҳафта ичида АҚШ Президенти Россия раҳбари билан дизель ёнилғиси етказиб бериш бўйича келишувга эришди, Москвага қарши иқтисодий санкцияни юмшатди, Украинани сайлов ўтказишга чақирди. Шунингдек, у Зеленский билан “келишиш Путинга қараганда анча қийин”лигини таъкидлади.
Ўз позициясини тобора қатъийлаштираётган Зеленский дизель ёнилғиси бўйича келишувни “тарихий хато” деб атади. У Америка ва Россия ўртасида газ етказиб бериш, банк соҳаси, кимё саноати ва музлатилган маблағ билан боғлиқ бошқа келишувлар ҳам навбатда турган бўлиши мумкинлигидан огоҳлантирди.
Маълумки, Киев “Starlink” сунъий йўлдош алоқасидан фойдаланиш ва Америкадан қурол етказиш борасида ҳам кутилмаган чекловга дуч келган.
– Менимча Украинани таслим бўлишга кўндириш учун муайян қадамлар ташланди, – деган Зеленский “Bloomberg” агентлигига берган интервьюсида.
Бу сўзлар Трамп ва Путин ёпиқ эшик ортида махфий келишувга эришиб, Киевни таслим бўлишга мажбур қилиши мумкинлиги ҳақидаги кўп йиллик хавотирни эслатди. Путиннинг уч томонлама учрашув ўтказиш таклифи эса хатарни янада кучайтиради. Воқеалар бундай ривожланишини Европа мамлакатлари ҳам кутмаган эди.
Бинобарин, танқид ва кенг кўламли норозиликка қарамай, Европа ҳали Трампдан узоқлашиб, бутунлай мустақил сиёсат юритишни истамаётгандек. Эҳтимол, кўҳна қитъа бунга ҳозирча тайёр ҳам эмас.
Кенжа Бекжонов, Салимжон Обиджонов (видео), ЎзА
