Трамп Папага қаршими?
Президент Дональд Трамп католик черкови раҳбари Папа Левни очиқча танқид қилиб, ташқи сиёсатда “ёмон ишлаётгани” ва "жиноятга мойиллик масаласида заиф” эканини таъкидлаган. Мазкур баёнот ижтимоий тармоқда кенг кўламли баҳс келтириб чиқарди. Айниқса, диндорлар бу гапни кескин қабул қилди.
Папа Лев сўнгги вақтда Эрон билан боғлиқ уруш ва миграция сиёсати юзасидан танқидий фикрлар билдириб келаётган эди. У зўравонликни “ақлсизлик” деб атаб, томонларни тинчликка чақирган. Шунингдек, АҚШдаги мигрантларга нисбатан муносабатни ҳам танқид қилган. Бу эса Трамп позициясига тўғридан-тўғри зид келди.
Католик черкови вакиллари Президент баёнотини қоралади. Улар таъкидлашича, Папа сиёсатчи эмас, балки маънавий етакчи. Шу боис, унга нисбатан ҳужум ноўрин баҳоланмоқда. Мутахассислар айни ҳолатни давлат раҳбари ва диний етакчи ўртасида кам учрайдиган очиқ қарама-қаршилик сифатида кўряпти.
Бу низо Вашингтон сиёсий муҳитига ҳам таъсир қилиши мумкин, чунки католиклар мамлакатда улкан ижтимоий қатламни ташкил қилади. Қолаверса, Папа ва Трамп ўртасидаги фикр тўқнашуви халқаро миқёсда ҳам эътиборга тушиб, диннинг сиёсат билан мураккаб муносабатини яна бир бор намоён қилди.
Мусулмон Зиё,
ЎзА
