Трамп Европани садоқатсизликда айблади (+видео)
АҚШ президенти Дональд Трамп НАТО бўйича Европа иттифоқчиларини яна қаттиқ танқид қилди. Унинг айтишича, европаликлар АҚШни қўллаб-қувватлашда етарлича садоқат кўрсатмаяпти. Бу ҳақда Euronews нашри хабар берди
Трамп Вашингтонда НАТО бош котиби Марк Рютте билан учрашди. Бу учрашув июль ойида бўладиган НАТО саммити арафасида бўлиб ўтди.
Трампнинг таъкидлашича, Европа давлатлари уни Эронга қарши сиёсатда етарлича қўллаб-қувватламаган.
«Бизга уларнинг пули ҳам керак эмас, ҳеч нарсаси керак эмас. Бизда дунёдаги энг кучли армия бор. Лекин мен садоқатни хоҳлайман. Биз уларга доим содиқмиз, улар учун ҳар доим курашамиз. Европада минглаб аскарларимиз бор, фақат Германиянинг ўзида 50 минг нафар ҳарбийларимиз бор. Бизга кичик бир ишора керак, бизга эътибор кўрсатишсин, садоқат керак холос. Биз кўп нарса сўраётганимиз йўқ»- деди Трамп.
Марк Рютте европалик иттифоқчиларни оқлашга ҳаракат қилди ва улар Трампга билвосита ёрдам берганини айтди.
«Мен Европа иттифоқчилари АҚШни етарлича қўллаб-қувватламади, деган баҳсларни биламан. Аммо рақамларга эътибор берсак, бошқача вазиятни кўрамиз. Ўтган сафар Эрон билан можаро давом этган олти ҳафта давомида Европа базаларидан 4–5 мингта АҚШ самолётлари учган» -деган НАТО Бош котиби
Лекин, Марк Рюттенинг бу баёноти турли давлатларда танқидларга сабаб бўлди. Масалан, Теҳрон бу сўзларни Эронга қарши урушда иштирок этишни расман тан олиш деб баҳолади. Италия эса Рюттенинг гапларини чалғитувчи деб атади ва Рим фақат техник ва логистик парвозларга рухсат берганини маълум қилди.
<iframe width="650" height="420" src="https://www.youtube.com/embed/qS6TFyCC2aA" title="Tramp Yevropani sadoqatsizlikda aybladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов, ЎзА
