Тўқимачилик кўргазмаси - самарали музокара ва битимлар ҳудуди (+видео)

13-15 май кунлари “Ўзэкспомарказ”да 26-Халқаро «Тўқимачилик ва тикувчилик саноати - TextileExpo Uzbekistan 2026» кўргазмаси бўлиб ўтмоқда. Албатта бу тадбир тўқимачилик саноатида замонавий технология ва инновацияларни кўриш имконияти, хорижий ишлаб чиқарувчиларнинг энг сара тажрибаларини ўрганиш ва экспорт географиясини кенгайтириш учун катта қулайликдир.

Бугунги кунда кўргазма ўнлаб мамлакатлардан ишлаб чиқарувчилар, харидорлар, чакана сотувчилар ва дистрибьюторларни бирлаштирган миллий бренд ва муҳим бизнес платформадир. Бу ерда самарали бизнес алоқалари шаклланади, таъминот бўйича музокаралар олиб борилади, янги коллекциялар тақдим этилади ва ишлаб чиқариш имкониятлари муҳокама қилиб олинади. Шу билан бирга, кўплаб халқаро мутахассислар учун кўргазма Ўзбекистон фабрикалари билан бевосита ишлаш ва минтақадаги янги етказиб берувчиларни кашф этиш имкониятидир. 

- 3 кун давомида “Ўзэкспомарказ”нинг 3-4-павильонларида кўргазма бўлиб ўтмоқда, - дейди “Iteca Exhibitions” халқаро кўргазма компанияси менежери Нодира Ҳайитбоева. – Кўргазма албатта аввалгилардан фарқ қилади.Сабаби бу йил кўпроқ компаниялар иштирок этмоқда. Илк бор кўргазмага Вазирлар Маҳкамаси ҳузуридаги Енгил саноатни ривожлантириш агентлиги расмий кўмак кўрсатмоқда. Улар кўмагида “Madein Uzbekistan” стенди ташкил этилган. Шу билан бирга жуда кўплаб янги қўшилган компанияларнинг дебют иштироки бўлиб ўтмоқда. 

Кўргазмада Россия, Туркия, Хитой, Қозоғистон каби давлатларнинг 170 дан ортиқ компания ва брендлар, шунингдек, яқин ва узоқ хориждаги 15 та мамлакатдан 400 дан ортиқ байер иштирок этмоқда.

Экспозиция анъанавий равишда ишлаб чиқариш циклининг барча босқичларини - хом ашёдан тортиб тайёр маҳсулот ва аксессуарларгача қамраб олади. Ташриф буюрувчилар диққатига калава ип, матолар, трикотаж буюмлар, фурнитура ва аксессуарлар, тайёр кийим-кечак, техник ва уй текстили, пайпоқ маҳсулотлари, шунингдек, тўқимачилик саноати учун кимёвий моддалар ва бўёқлар намойиш этилди. 

Эътиборлиси бу йил 20 дан ортиқ маҳаллий компаниялар кўргазмада илк бор иштирок этмоқда. Шундай бўлсада улар томонидан тақдим этилган маҳсулотлар жаҳон брендлариникидан қолишмади. 

<iframe width="640" height="420" src="https://www.youtube.com/embed/WdiW8U0dEIo" title="To‘qimachilik ko‘rgazmasi - samarali muzokara va bitimlar hududi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Ойбек Давронов, Улуғбек Тўхтаев (видео), ЎзА