АҚШ-тың сайланған президенті Дональд Трамп 2024 жылы әлемге ең үлкен ықпал еткен тұлға ретінде танылды.

12 желтоқсанда TIME журналы Дональд Трампты «2024 жылдың адамы» деп атады.

1927 жылдан бері TIME журналы «жақсы немесе жаман болуына қарамастан», соңғы 12 ай ішінде әлемге ең үлкен ықпал еткен тұлға, топ немесе идеяны таңдап келеді. 2023 жылы бұл атақ әнші Тейлор Свифтке берілген еді.

Трамппен қатар 2024 жылғы үміткерлер тізімінде АҚШ-тың вице-президенті Камала Харрис, Уэльс ханшайымы Кейт Миддлтон, кәсіпкер Илон Маск, ресейлік оппозиционер Алексей Навальныйдың жесірі Юлия Навальная, Израиль премьер-министрі Биньямин Нетаньяху, АҚШ Федералды резерв жүйесінің төрағасы Джером Пауэлл, подкастер Джо Роган, Мексика президенті Клаудия Шейнбаум, Meta бас директоры Марк Цукерберг және басқа да тұлғалар болды.

Дональд Трамп 2024 жылы Республикалық партиядан АҚШ президенттігіне кандидат болып, үлкен басымдықпен жеңіске жетті. Сайлауалды науқаны кезінде оған қастандық жасалды. Ол 2025 жылдың қаңтар айында екінші президенттік мерзіміне кіріседі.