Техникумда такомиллашган дуал таълим (+видео)
Фарғона вилоятида Бешариқдаги 1-сонли техникум халқ тилига тушган. Сабаби бу ерда ҳамиша малакали мутахассислар тайёрланганлигида. Унинг битирувчилари орасида мамлакатда таниқли автомобилист, қишлоқ хўжалиги ходимлари, қурувчилар бор. Бугун ҳам бу ерда 8 та касбий йўналишда 1110 нафар йигит-қизлар тикувчи, пайвандчи, автомобиль таъмирловчи, компьютер графикаси ва узатиш каби касбларга ўргатилмоқда.
Ўзбекистон Президентининг алоҳида топшириғи асосида техникумларда дуал таълим йўлга қўйилди. Энди улар билим олади, касб ўрганади ва айни чоғда ўқув муддатини қирқ фоиз вақтини ишлаб чиқаришда ўтказади.
Бешариқ тумани ҳокимлигининг ташаббуси ва қўлловида техникум ҳудудидаги собиқ қишлоқ хўжалиги техникалари гаражи ва омборига хорижий инвестор жалб этилиб тикувчилик цехи ташкил этилди. Унинг тантанали очилиш маросимида сўзга чиққанлар энди техникумнинг тикувчилик йўналишидаги ҳар бир ўқувчи шу ерда назарий билимларини амалда қўллаш имкони бўлади, деди.
Рамзий лента кесилиб, Бешариқ туманида тўғридан-тўғри инвестиция асосидаги яна бир корхона фаолиятини бошлади.
– Биз Бангладешнинг “MIОLAR textile” корхонаси Бешариқда 200 ишчи ўринли корхона қуриб ишлаб келаётган эдик, – дейди компания муассиси Анвар Мансур. – Бу ерда эса 400 иш ўрни яратдик. Энди бизга ишчилар керак. Бешариқлик тикувчилар ишлаб чиқарган маҳсулотни эса юз фоиз экспорт қиламиз. Техникум ўқувчи-қизларини ўқишдан бўш пайтларида касб амалиётига ўргатамиз. Ҳозир шогирдларимиз орасидан 200 нафар мураббий тайинладик.
– Ёнимда ишлаётган Дилнавоз Муҳаммаджонова 1-босқич талабаси. У дуал таълим асосида ўқийди. Дилнавоз назарий билимини “MIОLAR textilе”да мустаҳкамлаяпти. Техникумнинг тикувчилик йўналишида ўқиётган 100 нафар қизларимиз мазкур корхона билан шартнома асосида ишлаяпти ва бажарган ишлари учун иш ҳақи олиб даромад топяпти, – дейди техникум директори Зилола Вассиева.
Мана энди Бешариқдаги 1-сонли техникумда дуал таълим тўлақонли шаклга эга бўлди. Аммо Бангладеш компаниясининг режалари катта.
– Яқин кунларда бош кийим – кепка ишлаб чиқаришни бошлаймиз. Кейин эса пахтани қайта ишлаб ип ишлаб чиқарадиган корхона қурамиз, – дейди “MIОLAR textile” директори ўринбосари Ахтар Салмон. – Бу билан экспорт салоҳиятимизни оширамиз, қолаверса, техникум ўқувчиларини тўқимачилик корхонасида касбга ўргатамиз.
Техникум қошида очилган тикувчилик корхонасида юқорида айтилганидек, 400 та иш ўрни яратилди. Ҳозирча 200 нафар талабгор иш бошлади. “MIОLAR textile”га яна 200 нафар ишчи керак.
<iframe width="640" height="420" src="https://www.youtube.com/embed/nYWSw55E8SE" title="Texnikumda takomillashgan dual ta’lim" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Муҳаммаджон Обидов,
Элёр Олимов (видео), ЎзА
