19–20 сәуір күндері Ташкент қаласы Орталық Азияның викиқоғамдастықтарын бір шаңырақ астына жинайтын алқалы жиынға айналмақ. Бұл айтулы шараны Wikimedia қоры қолдап, өңірдегі бірқатар ұйымдар мен бастамашыл топтардың ынтымақтастығымен өткізу жоспарланған.

Атап айтқанда, конференцияны Өзбек тілінде сөйлейтін викимедиашылар тобы, Diplomat International School білім ордасы, Өзбекстан өнертапқыштар мен рационализаторлар қоғамы, сондай-ақ көршілес елдердегі жергілікті викиқоғамдастықтар бірігіп ұйымдастыруда.

Басқосу аясында Орталық Азиядағы ерікті авторлар, редакторлар мен викибелсенділер бірлесе отырып, еркін білім тарату бағытында тәжірибе алмасып, жаңа жобаларды талқыламақ.