Ташкент қаласында ауа сапасын жақсартуға байланысты шаңдануды азайту және экологиялық ахуалды жақсарту бағытындағы кең ауқымды шаралар жүйелі әрі тұрақты түрде жүргізіліп келеді.

Қала әкімдігі барлық аудандардағы орталық және ішкі көшелерді арнайы техниканың көмегімен тұрақты жуу жұмыстарын ұйымдастыруда. Жол бойларына орнатылған жасанды суару жүйелері толық қуатта іске қосылып, шаңның көтерілуін азайтуға және ауа сапасын жақсартуға айтарлықтай ықпал етіп отыр.

Белгілі болғандай, қалалық ортада шаң деңгейінің жоғарылауы кезінде ең тиімді және жедел шаралардың бірі – жол жабыны мен оған іргелес аумақтарды үнемі суландырып отыру. Бұл тәсіл ғылыми тұрғыдан дәлелденген және әлемнің бірқатар ірі мегаполистерінде ластану деңгейі күшейген уақытта кеңінен қолданылады.

Осыған байланысты Ташкент қалалық әкімдігі мен Абаттандыру басқармасы жолдарға су себу, жасыл аймақтарды қарқынды суару жұмыстарын күшейткен. Биылғы субұрқақтар маусымы аяқталғанына қарамастан, қаладағы барлық субұрқақтар мен шағын климаттық қондырғылар қайтадан іске қосылды.

Жүргізіліп жатқан жұмыстар қала, аудан және коммуналдық қызметтердің өзара үйлесімді іс-қимылы негізінде атқарылып жатыр. Әкімдік дерегінше, қаланы ылғалдандыру және тазалықты қамтамасыз ету үшін жалпы саны 55 арнайы техника тартылған. Оның ішінде 18 техника – қалалық абаттандыру бас басқармасына, 12-сі – аудандық бөлімдерге, 4-еуі – сумен жабдықтау кәсіпорнына, 17-сі – Автожолдар комитетіне, ал 4 техника – «Махсустранс» мекемесіне тиесілі.

Сонымен қатар, жасыл аймақтарды суару желілері толық тексеріліп, 3 млн 560 мың шаршы метр аумақты қамтитын көгалдар мен бұталарды тұрақты суаруға арналған спринклер жүйесінің жұмысы қайта жанданды.

Қала ішінде орналасқан 17 арнаның бойында жоғары қысымды су бүрку жүйелері іске қосылып, осы аймақтардағы шаңның көтерілуіне тосқауыл қойылды. Табиғи ылғалдандыруды күшейтетін, шаң бөлшектерін басуға және жергілікті микро-климатты жақсартуға үлес қосатын 55 субұрқақ түгелдей жұмыс режиміне қайта оралды. Қыс мезгілінде тоқтаған субұрқақтардың сорғы станциялары да толық электрмен жабдықталды.

Арнайы техникамен көшелердегі ағаштар, жаяу жүргінші жолдары және жол жиектері жуылып, бұл жұмыстар тәулік бойы үш ауысымда атқарылуда. Осындай кешенді іс-шаралар Ташкенттегі атмосфералық ауаның сапасын жақсартуға және шаңнан туындайтын қолайсыздықтарды азайтуға бағытталған.