Ташкент әуежайында ірі көлемдегі мефедрон тәркіленді
Ташкент халықаралық әуежайында шетелден әкелінген 4,4 килограмм синтетикалық есірткі – мефедрон тәркіленді. Жедел іс-шаралар барысында аталған есірткі затын қабылдап алмақ болған жергілікті тұрғын да қолға түсті.
«Қауіпсіз және салауатты ел» жедел-профилактикалық іс-шаралары аясында Мемлекеттік қауіпсіздік қызметінің қызметкерлері «Ташкент-Аэро» мамандандырылған кеден кешенімен бірлесіп, шетелден ірі көлемде синтетикалық есірткі затын ел аумағына заңсыз алып кіру әрекетінің жолын кесті.
Мәліметке сәйкес, «Бангкок–Шарджа–Ташкент» бағыты бойынша ұшып келген 1994 жылы туған Қазақстан азаматының қол жүгі тексерілген кезде әртүрлі тәттілердің сегіз қаптамасы мен бес пластик ыдыстың ішіне жасырылған жалпы салмағы 4,4 килограмм мефедрон синтетикалық есірткі заты анықталды.
Осыдан кейін жүргізілген жедел іс-шара барысында интернет арқылы жұмыс істейтін есірткі дүкені басшысының тапсырмасы бойынша аталған есірткі затын Ташкент қаласындағы қонақүйлердің бірінен қабылдап алған «Янгийул» қаласының 2006 жылы туған тұрғыны да ұсталды.
Тексеру кезінде жергілікті тұрғынның жанынан пневматикалық тапанша табылып, белгіленген тәртіппен рәсімделіп алынды.
Қазіргі уақытта аталған тұлғаларға қатысты Қылмыстық кодекстің 246-бабы 2-бөлігі бойынша қылмыстық іс қозғалып, оларға қамауға алу түріндегі бұлтартпау шарасы қолданылды. Тергеу амалдары жалғасып жатыр.
