Сурур

БАҒИШЛОВ

Яратган танлаб-танлаб,
Икки тоза булоқни;
Бир адирга жойлади
Ўзбек билан қозоқни.

Гир-гир айланди дунё,
Чангитиб қир, яйдоқни.
Чанг-тўзонлар тоблади
Ўзбек билан қозоқни.

Ўчирай, деб ғанимлар,
Дўстлик деган чироқни;
Роса гижгижладилар
Ўзбек билан қозоқни.

Аммо жасур боболар,
Янчиб турфа тузоқни,
Омон олиб ўтдилар
Ўзбек билан қозоқни.

Бўлмагандек ажратиб
Дўстлар, этдан тирноқни;
Айро қилолмас ҳеч ким
Ўзбек билан қозоқни.

Кетаётир карвонлар,
Баланд тутиб маёқни.
Эртаси хуш, ёронлар
Ўзбек билан қозоқни.

Икки ботир Элбоши
Кўзлаб узоқ-узоқни,
Чорлаётир фалакка
Ўзбек билан қозоқни.

Тиккаймиз кўк тоқига
Икки улуғ байроқни,
Еру осмон олгай тан
Ўзбек билан қозоқни.

Қозоқ билан ўзбекни
Ўзбек билан қозоқни.

Абдусаид КЎЧИМОВ.