Суд Трамп маъмуриятига журналистлар аккредитациясини тиклашни буюрди (+видео)
АҚШ федерал суди Дональд Трамп маъмуриятини бир неча ОАВ журналистлари учун Оқ уйга кириш ҳуқуқини тиклашга мажбур қилади. Уларнинг аккредитацияси Президент қарори билан бекор қилинган эди. Судья Тимоти Келли бу тақиқ тегишли ҳуқуқий жараён кафолатини бузган, деган хулосага келди. Бу ҳақда “Euronews” хабар тарқатди.
Маълум қилинишича, нашрлар таҳририятларига қарор ҳақида олдиндан хабар берилмаган, Оқ уйга кириш ҳуқуқидан маҳрум этилишидан аввал журналистларнинг бу қарор устидан шикоят қилиш имконияти чекланган.
Судья қарорда АҚШ ҳуқуқ тизимида узоқ вақтдан бери амал қилиб келаётган ҳуқуқий тамойилга таяниб, Конституция билан ҳимояланган ҳуқуқдан маҳрум қилишдан олдин, давлат шахсга ўз далилини баён қилиш имкони берилиши кераклигини қайд этди.
– Умумий қоида шундайки, давлат фуқарони Конституция ҳимоясидаги ҳуқуқдан маҳрум қилишдан аввал уни хабардор қилиши ва шахсга ўз фикрини билдириш имкониятини бериши шарт, – деб ёзган Келли.
Суд қарорига кўра, мазкур ОАВ вакилларининг Оқ уй ҳудудига кириши дарҳол тикланиши керак. Дональд Трамп тақиқ ҳақида жума куни ижтимоий тармоқ орқали маълум қилган. У ушбу нашрларни “сохта хабарлар тарқатиш”да айблаган ва бошқа таҳририятлар ҳам шундай чораларга дуч келиши мумкинлигидан огоҳлантирган. Бинобарин, маъмурият аккредитациялар бекор қилингандан бир неча кун ўтиб, кейинги чоршанбага қадар қарор устидан шикоят қилишнинг ҳеч қандай тартибини белгиламаган.
Судда АҚШ Адлия вазирлиги ҳуқуқшунослари мазкур тақиқни миллий хавфсизлик нуқтаи назаридан оқлашга уринди. Жумладан, Оқ уйнинг Шарқий қаноти остида бункер қуриш режаси ҳақидаги материалга ишора қилди. ОАВ вакилларининг адвокати эса тақиқ эълон қилинган пайт миллий хавфсизлик масаласи тилга олинмагани, бу важ судга даъво аризаси берилгандан кейин пайдо бўлганини рўкач қилди.
Судья қарори аккредитацияси бекор қилинган таҳририятларни қўллаб-қувватлаш кампанияси даврида қабул қилинди. Йирик телеканалларни ўз ичига олган қарийб 50 та ахборот ташкилоти уларни ҳимоя қилиб чиқди.
– Жамият ўз ҳукумати фаолияти ҳақида аниқ ва мустақил ахборот олишдан манфаатдор, – дейилган ABC, CBS, CNN, Fox ва NBC телеканаллари қўшма баёнотида. – Ҳеч бир маъмуриятга матбуот фаолиятини фақат ёритиш услуби ёқмагани учун чеклашга йўл қўйилмаслиги керак.
Кенжа Бекжонов, Улуғбек Тўхтаев, (+видео) ЎзА
