Соғлом авлодни вояга етказишда она сути билан озиқлантиришни қўллаб-қувватлашнинг аҳамияти
Мамлакатимизда она ва бола саломатлигини муҳофаза қилиш давлат сиёсатининг устувор йўналишларидан бирига айланган. Хусусан, гўдаклар ва кичик ёшдаги болаларни она сути билан озиқлантиришни қўллаб-қувватлаш масаласи алоҳида эътибор марказида турибди. Бу борада қабул қилинган Ҳукумат қарори она сути билан озиқлантиришни кенг тарғиб қилиш, тиббиёт ходимлари ва ота-оналарнинг масъулиятини ошириш ҳамда болалар озиқ-овқат маҳсулотларига қўйилган талабларни кучайтиришга қаратилган муҳим ҳужжат бўлиб хизмат қилмоқда.
Мазкур қарорга мувофиқ, гўдаклар ва кичик ёшдаги болаларни она сути билан озиқлантиришни қўллаб-қувватлаш дастури тасдиқланди. Дастур доирасида бир қатор муҳим йўналишлар белгиланган бўлиб, улар орасида норматив-ҳуқуқий базани такомиллаштириш, халқаро стандартларни жорий этиш, сунъий озиқлантириш маҳсулотлари рекламасини маълум қадар чеклаш ва сифат назоратини кучайтириш алоҳида ўрин тутади.
Шунингдек, мазкур соҳада мувофиқлаштирувчи орган сифатида Республика кенгаши ташкил этилди. Кенгашнинг асосий вазифалари - она сути билан озиқлантиришни тарғиб қилиш, илғор халқаро тажрибаларни жорий этиш ҳамда давлат ва жамоатчилик ташкилотлари ўртасида ҳамкорликни кучайтиришдан иборат.
Тиббиёт мутахассисларининг таъкидлашича, она сути боланинг илк ҳаётида тенгсиз озуқа манбаи ҳисобланади. Қолаверса, она сути таркибида бола организми учун зарур бўлган барча озиқ моддалар, витаминлар ва иммунитетни мустаҳкамловчи элементлар мавжуд. Айниқса, ҳаётининг илк олти ойида фақат она сути билан озиқланган болаларда касалликларга чидамлилик юқори бўлади.
Бундан ташқари, она сути нафақат бола, балки она саломатлиги учун ҳам фойдали. У туғуруқдан кейинги тикланиш жараёнини тезлаштиради ва айрим касалликлар хавфини камайтиради.
Қарорда алоҳида эътибор қаратилган жиҳатлардан яна бири, аҳолининг бу мавзу бўйича хабардорлигини оширишдир. Шу мақсадда оммавий ахборот воситалари, тиббиёт ва таълим муассасалари ҳамда маҳаллалар орқали кенг кўламли тарғибот ишлари олиб борилиши белгиланган.
Умуман олганда, она сути билан озиқлантиришни қўллаб-қувватлашга қаратилган ушбу ташаббуслар соғлом авлодни вояга етказишда муҳим аҳамият касб этади. Давлат сиёсати, тиббиёт тизими ва жамоатчилик ҳамкорлиги орқали бу борадаги ишлар янада самарали йўлга қўйилиши кутилмоқда.
Дилдора ДЎСМАТОВА, ЎзА
