Швейцария Россияга қарши санкцияни кучайтирмоқда
Швейцария Федерал кенгаши ЕИ томонидан апрель ойида қабул қилинган Россияга қарши санкциянинг 14-тўплами доирасида қўшимча чеклов чоралари жорий этишга қарор қилди. 20 августдан кучга кирадиган янги тартиб асосан суюлтирилган табиий газ (СТГ), экспорт-импорт ва молия соҳаларини қамраб олган.
Хусусан, Россиянинг СТГ танкерлари ва терминалларига хизмат кўрсатиш ҳамда ушбу мамлакатга кема сотиш тақиқланди. Учинчи давлатларга кема сотиш шартномасига эса РФга қайта сотишни ман этувчи махсус банд киритилиши шарт.
Бундан ташқари савдо соҳасида аввалги чекловни айланиб ўтишнинг олдини олувчи янги назорат тизими жорий этилмоқда. Молиявий томондан эса рус крипто платформалари орқали маблағ ўтказиш ва рақамли рубль каби крипто-активни ривожлантиришни қўллаб-қувватлаш ман этилган.
Шунингдек, швейцариялик тадбиркорларни Россия ҳудудидаги ноқонуний суд қарори ва интеллектуал мулк билан боғлиқ хавфдан ҳимоя қилиш бўйича қўшимча кафолат ҳам кўзда тутилган.
Ф.Яхшибоева, ЎзА
