НАТО Бош котиби Марк Рюттенинг сўзларига кўра, АҚШ ва Европадаги иттифоқчилар Россияни узоқ муддатли таҳдид сифатида баҳоламоқда. 24 апрель куни Вашингтонда Президент Дональд Трамп билан учрашувдан сўнг шу мазмунда баёнот берган.

Аввалроқ у ўз қароргоҳида аъзо мамлакатлар ташқи ишлар вазирлари иштирокида кечган йиғилишдан сўнг РФ барибир, яъни Украина билан уруш тугаса ҳам биз учун хавф бўлиб қолаверади, деганди.

НАТО Россиянинг коинотда ҳам сунъий йўлдошга қарши ядро қуроли жойлаштириш ниятидан хавотирда.

– Бу нафақат хавфли, балки 1967 йил имзоланган шартномага зид, – деган Бош котиб. – РФнинг коинотдаги салоҳияти анчагина камтар. Шунинг учун фазода ядро қуролини қўллаш орқали бу камчиликни ёпишга ҳаракат қилиши мумкин.

Шимолий Атлантика альянси раҳбари Японияга ташрифи чоғида Хитой, Россия ва Шимолий Кореянинг ҳарбий ҳамкорлигидан жиддий хавотир билдирган. Бу уч мамлакат бирга қуролли машғулот ўтказиб, глобал барқарорликка таҳдид солаётганини айтган.

– Хитойнинг ҳарбий салоҳияти шиддат билан ўсмоқда, – деганди у ўшанда. – Биз содда бўлмаслигимиз керак.

АҚШ НАТОнинг Осиё-Тинч океани минтақасидаги иштироки кучайишини хоҳламоқда. Бу эса тузилма глобал миқёсда фаоллашувини англатади.

Афтидан, дунё ўзгармоқда, сайёрамиз хавфсизлигини асраш долзарб глобал масалага айланмоқда.

К.Бекжонов, ЎзА