Қишлоқ хўжалиги маҳсулотларини Хитой бозорига экспорт қилиш истиқболлари кўриб чиқилди

Мамлакатимизда қишлоқ хўжалиги соҳасига хорижий инвестицияларни жалб этиш, экспорт салоҳиятини ошириш ҳамда халқаро ҳамкорликни кенгайтириш борасида самарали ишлар амалга оширилмоқда.

Қишлоқ хўжалиги вазирлиги масъуллари ҳамда Хитойнинг Rongling International Investment Group Co., Ltd. компанияси вакиллари ўртасида учрашув бўлиб ўтди.

Мулоқот давомида қишлоқ хўжалиги соҳасига инвестицияларни жалб қилиш, экспорт салоҳиятини ошириш ҳамда истиқболли ҳамкорлик йўналишларини ривожлантириш масалалари муҳокама қилинди, дейилади Қишлоқ хўжалиги вазирлиги маълумотида.

Учрашувда қисқа муддатда амалга оширилиши мумкин бўлган инвестиция лойиҳаларини шакллантириш, озиқ-овқат саноатида қўшма лойиҳаларни йўлга қўйиш имкониятлари кўриб чиқилди.

Шунингдек, ёнғоқчилик, қуритилган меваларни етиштириш ва қайта ишлаш, қишлоқ хўжалиги маҳсулотларини Хитой бозорига экспорт қилиш истиқболлари юзасидан фикр алмашилди.

Томонлар қишлоқ хўжалиги маҳсулотларини етиштириш, сақлаш, қайта ишлаш ва экспорт қилиш занжирини ривожлантириш, замонавий технологияларни жорий этиш ҳамда янги инвестиция лойиҳаларини амалга ошириш масалаларига алоҳида эътибор қаратди.

Бундан ташқари, қайта тикланувчи энергия, кабель саноати ва бошқа йўналишларда ҳам ўзаро манфаатли ҳамкорлик имкониятлари муҳокама қилинди.

Учрашув якунида Ўзбекистоннинг аграр салоҳиятидан самарали фойдаланиш ҳамда қишлоқ хўжалиги маҳсулотлари экспорт географиясини кенгайтириш бўйича ҳамкорликни давом эттиришга келишиб олинди.

М. ҲОЖИАКБАРОВА,

ЎзА