Қимматли қоғозлар эмитентларининг рейтингини юритиш тартиби белгиланди

Адлия вазирлиги қимматли қоғозлар эмитентлари рейтингини юритиш бўйича янги тартибни рўйхатдан ўтказди. Ушбу ҳужжат бозорда шаффофликни ошириб, акциядорлар ҳуқуқини қандай ҳимоя қилади?

Адлия вазирлиги томонидан Қимматли қоғозлар эмитентларининг рейтингини юритиш тартиби тўғрисидаги идоравий ҳужжат давлат рўйхатидан ўтказилди.

2026 йил 17 сентябрда имзоланган мазкур ҳужжат Ўзбекистон Республикаси Президентининг 2025 йил 18 декабрдаги Фармонига мувофиқ ишлаб чиқилган бўлиб, қимматли қоғозлар эмитентларининг фаолиятини баҳоловчи рейтингни юритиш ҳамда ушбу рейтинг асосида тегишли таъсир чораларини қўллаш тартибини белгилайди.

Эмитентлар рейтинги ҳар чорак натижаси бўйича Истиқболли лойиҳалар миллий агентлиги томонидан юритилади ва Корпоратив ахборот ягона порталида (openinfo.uz) очиқ эълон қилинади.

Рейтинг натижалари ҳисобот чорагидан кейинги иккинчи ойнинг дастлабки 10 кунлигида эълон қилинади ҳамда эмитентларга бу ҳақида шахсий кабинет орқали хабар юборилади.

Бунда, эмитентлар рейтинги 7 та мезон бўйича берилган баллар йиғиндисига кўра аниқланади.

Тўпланган баллар йиғиндисига кўра, эмитентга “А” , “Б”, “C”, “Д” тоифалардан бири берилади.

Ушбу тоифаларга кўра эмитентларга нисбатан таъсир чоралари қўлланилиши мумкин ҳамда ушбу таъсир чораларини амал қилиш муддати 3 ой ҳисобланади.

Таъкидланишича, низомнинг қабул қилиниши эмитентлар фаолиятининг шаффофлигини ошириш ва қимматли қоғозлар бозорида акциядорлар ҳуқуқларини ҳимоя қилишга қаратилган.

Шербек Исломов, ЎзА