Қиличбозлик спортининг истиқболли масалалари белгиланди
Тошкентда “Қиличбозлик келажаги: инновация, оммавийлик ва глобал ривожлантириш” мавзусида VI қитъалараро халқаро конференция бўлиб ўтди.
Дунёнинг 116 та давлатидан 160 нафарга яқин расмий вакиллар, халқаро ва қитъа қиличбозлик федерациялари раҳбарлари ҳамда соҳа мутахассислари иштирок этган халқаро конференцияда қиличбозлик спортини янада оммалаштириш, уни ривожлантиришда замонавий ва инновацион ёндашувлардан фойдаланиш, халқаро ҳамкорликни мустаҳкамлаш ҳамда спорт турининг глобал миқёсдаги истиқболлари муҳокама қилинди.
Конференцияда спорт вазири Адҳам Икромов, Халқаро қиличбозлик федерацияси вақтинчалик президенти Абделмонеим Элҳуссеин, Осиё қиличбозлик конфедерацияси раҳбари Шайх Салем Бин Султан Ал Қасими, Панамерика қиличбозлик конфедерацияси раҳбари Виталий Логвин, МОҚ бош котиби Ойбек Қосимов, Ўзбекистон қиличбозлик федерацияси бош котиби Гулнора Саидова, шунингдек, Европа, Африка ва бошқа минтақавий ташкилотлар раҳбарлари иштирок этди.
Муҳокамалар жараёнида мазкур нуфузли анжуман ва унда кўтарилган масалалар нафақат Ўзбекистонда, балки халқаро майдонда қиличбозлик спортини ривожлантиришга қаратилгани билан аҳамиятли экани айтилди.
Бундан ташқари, Тошкент анжумани қиличбозлик спортининг илғор тажрибаларини ўрганиш асносида ҳамкорлик муносабатларини янада кенгайтириш учун муҳим платформа вазифасини ўтагани таъкидланди.
Т.Рўзиев, ЎзА
