Путин Эроннинг матонатини юқори баҳолади ва…
Россия Президенти Владимир Путин “Валдай” халқаро мунозара клуби ялпи мажлисида Эрон халқининг иродаси ва мардлиги бутун дунё эътиборида турганини таъкидлади. Унинг қайд этишича, Ислом Республикаси давлат ва ҳарбий тизимида мамлакат манфаати йўлида фидойиликка тайёр юқори малакали кадрлар етарли, шу боис сафдан чиқарилган ҳар бир раҳбар ўрнини янги мутахассис эгаллай олади.
РФ раҳбари Миллий хавфсизлик кенгаши котиби Али Лорижоний ўлдирилишини жиддий хато сифатида баҳолади. Путин у билан шахсан таниш бўлгани ва марҳумни жуда ҳурмат қилганини билдириб, кескинликни юмшатиш ва муросага келиш жараёнида Лорижонийнинг тажрибаси жуда қўл келиши мумкин эди, деган фикрни илгари сурди.
Ядро дастури мавзусига тўхталар экан, Россия Эроннинг бойитилган уранини ўз ҳудудида қабул қилишга тайёрлигини айтди. Путиннинг сўзларига кўра, илгари бу таклифни барча томонлар, жумладан Исроил ҳам маъқуллаган. Фақат кейинчалик АҚШ ўз қарашини ўзгартириб, уранни ўзига топширишни талаб қила бошлаган.
Бундан ташқари РФ етакчиси АҚШ томонидан Эронга қарши киритилган ноқонуний санкция бекор қилинса, Ҳурмуз ва Боб-Ал-Мандиб бўғозларида кемалар хавфсиз ва эркин ҳаракати қайта тикланишини қўшимча қилди.
Ўз навбатида Россия Хавфсизлик кенгаши раиси ўринбосари Дмитрий Медведев Владимир Путин Эроннинг марҳум Олий раҳбари Али Ҳумонаийни ҳамиша юксак ҳурмат қилганини эслатди. Шу сабабли Путин ўтган июль ойида ушбу ҳурмат белгиси сифатида Медведевни Ҳумонаийнинг дафн маросимида Россия номидан қатнашиш учун юборган эди.
Ф.Яхшибоева, ЎзА
