Президент Шавкат Мирзиёев Имам Бұхари мемориалдық кешеніне зиярат жасады
Дәстүр бойынша, Мемлекет басшысы алдымен Имам Бұхари мемориалдық кешенін зиярат етті. Құран оқылып, дұға жасалды.
Сапар барысында Мемлекет басшысына кешенді тиімді пайдалану, оның туристік әлеуетін одан әрі арттыру, Имам Бұхаридің бай ғылыми мұрасын сақтау, зерттеу және әлемге таныту арқылы ислам ағартушылығы мен зиярат туризмін дамыту жөніндегі тапсырмалардың орындалуы туралы ақпарат берілді.
Өзбекстан басшысы бұл жұмыстарды жүйелі түрде жалғастыру қажеттігін атап өтті.
– Бұл ұлы тұлға бізге барша ғылымы мен білімін мұра етіп қалдырған. Сол білімді жалғастырсақ, ешқашан кем болмаймыз.
Мен де ұлы бабамызға әр зиярат еткен сайын халқымыздың өміріне береке дарысын, ырысымыз арта берсін деп дұға етемін.
Ұлыларымыздың мұрасын сақтау және насихаттау жолында әлі талай жұмыс атқарамыз. Бүкіл әлемнен адамдар Өзбекстанға келіп, Ислам өркениеті орталығы мен Имам Бұхари кешенін көріп, зиярат етуі үшін барлық жағдайды жасаймыз, – деді Мемлекет басшысы.
Президенттің бастамасымен жаңадан салынған кешен ислам әлеміндегі қасиетті орындардың бірі ретінде жергілікті және шетелдік зияратшыларға толы. Бұған дейін кешен бір күнде 12 мың зияратшыға қызмет көрсетсе, қазір бұл көрсеткіш 65 мыңнан асады.
Кешен құрамындағы 10 мың адамға арналған мешіт, зәулім кесене, әрқайсысының биіктігі 75 метр болатын төрт мұнара мен көгілдір күмбездер ғимараттың айбынын ерекше асқақтатып тұр. Заманауи ақпараттық технологиялар негізінде жабдықталған инновациялық музейде қасиетті дініміздің тарихы, пайғамбарлардың өмірі және Имам Бұхаридің хадис ғылымына қосқан үлесі кеңінен баяндалып, бірегей жәдігерлер көпшілік назарына ұсынылған.
Қазіргі уақытта кешенде зияратшылар үшін барлық жағынан қолайлы жағдай жасалып, халықаралық стандарттарға сай қызмет көрсету жүйесі жолға қойылған. Осынау қасиетті орын аумағында 20-дан астам заманауи қонақ үй жұмыс істейді.
