Президент «ROX Group» компаниясының инвестициялық жобаларымен танысты

Президент Шавкат Мирзиёев Бұхара облысына сапары барысында Вьетнамның «ROX Group» компаниясы елімізде жүзеге асыруды жоспарлап отырған жобалардың тұсаукесерімен танысты.

Компания өкілдері Бұхарада екі, Ташкент қаласының «Учтепа» ауданында және Самарқандта бір-бірден, жалпы төрт қала құрылысы жобасы туралы ақпарат берді. Олардың жалпы аумағы 285 гектарды, инвестиция көлемі 4,5 миллиард долларды құрайды. Жобалар 115 мың тұрғынға арналады.

Бұхара ауданында 65 гектар, ал Бұхара қаласында 25 гектар аумақта жаңа тұрғын үй кешендерінің құрылысы басталды. Мұнда 30 мың адамға арналған көпқабатты үйлер, қонақүйлер, бизнес-орталықтар, сауда және қызмет көрсету нысандары, сондай-ақ демалыс орындары салынады.

Ташкент қаласындағы жоба заманауи қалалық орта қалыптастыруға, ал Самарқандтағы бастама қолданыстағы туристік кешеннің айналасындағы инфрақұрылымды кеңейтуге бағытталған. Вьетнамдық инвестор Жызақ облысының «Зомин» ауданында индустриялық аймақ құру жөнінде де бастама көтерді.

Мемлекет басшысы ұсынылған тұжырымдамаларды мақұлдап, жобаларда озық қала құрылысы шешімдерін қолдану қажеттігін атап өтті. Жауапты тұлғаларға компаниямен бірлесіп, жобаларға қажетті инфрақұрылым мен оларды жүзеге асыру тетіктерін жан-жақты пысықтау жөнінде тапсырмалар берілді.