Президент Нөкістегі қазандықты когенерация технологиясы негізінде жаңғырту жобасымен танысты
Президент Шавкат Мирзиёев Нөкіс қаласындағы қазандықты когенерация технологиялары негізінде жаңғырту жобасының тұсаукесерімен танысты.
Күзгі-қысқы маусымда халықтың тұрғын үйлері мен әлеуметтік нысандарды тұрақты жылумен қамтамасыз ету, сондай-ақ жүйеге энергия үнемдейтін технологияларды енгізу – басым міндеттердің бірі.
Қазіргі таңда Нөкіс қаласындағы 47 көпқабатты тұрғын үй орталықтандырылған жылу жүйесіне қосылған, тағы 270 үй жергілікті жылыту жүйесін пайдаланады. Ал қалған көпқабатты үйлердің пәтерлері түрлі қолдан жасалған жылыту құралдарымен жылытылады. Мұндай құрылғылар көп энергия тұтынумен қатар, тұрғындардың денсаулығы мен өміріне де елеулі қауіп төндіреді.
Қаладағы қолданыстағы орталық қазандық 1976 жылы салынған және бүгінде негізінен әлеуметтік сала нысандарына қызмет көрсетіп келеді. Оның жабдықтары моральдық әрі физикалық тұрғыдан ескірген, энергия тиімділігі де төмен.
Қазіргі қазандықта 1 гигакалория жылу өндіру үшін шамамен 153 текше метр табиғи газ және 30 киловатт-сағат электр энергиясы жұмсалады. Оның нақты қуаты сағатына небәрі 1,6 гигакалорияны құрайды.
Таныстырылым барысында аталған қазандықты мемлекеттік-жекеменшік әріптестік негізінде когенерация технологияларын пайдаланып жаңғырту жобасы қаралды.
Когенерация технологиясы бір отын көзінен бір мезгілде электр және жылу энергиясын өндіруге мүмкіндік береді. Бұл ресурстарды тиімді пайдалануға, өндірістік шығындар мен қоршаған ортаға бөлінетін зиянды заттардың көлемін азайтуға ықпал етеді.
Жоба аясында сағатына 34,4 гигакалория жылу және 21,5 мегаватт электр энергиясын өндіретін заманауи кешен салынады.
Сонымен қатар, 28 шақырым жылу желісі тартылып, 189 жеке жылу пункті орнатылады. Көпқабатты тұрғын үйлер мен әлеуметтік нысандардың ішкі жылыту жүйелері қалпына келтіріліп, қажетті газ және электр инфрақұрылымы жаңартылады.
Бірінші кезеңде 136 көпқабатты үйдегі шамамен 6 мың пәтер, яғни 23 мың тұрғын және 40 әлеуметтік нысан орталықтандырылған жылу жүйесіне қосылады. Кейінгі кезеңдерде Нөкіс қаласындағы барлық көпқабатты үйлер мен әлеуметтік нысандарды орталықтандырылған жылумен қамту жоспарланған.
Жобаның алғашқы кезеңіне 20 миллион АҚШ долларынан астам тікелей шетелдік инвестиция тартылып, кешенді 2028 жылдың ақпан айында толық іске қосу көзделіп отыр.
Жаңғырту нәтижесінде қазандықтың пайдалы әсер коэффициенті 80 пайыздан 91 пайызға дейін артады. Жылу өндіру көлемі бірнеше ондаған есе ұлғайып, жылына 172 мың мегаватт-сағатқа дейін электр энергиясын өндіруге мүмкіндік туады.
Сонымен қатар, жыл сайын 12,2 миллион текше метр табиғи газ үнемделіп, атмосфераға шығарылатын зиянды заттардың көлемі де айтарлықтай қысқарады.
Жаңа кешенде 19 жаңа жұмыс орны ашылады. Сондай-ақ сала мамандарының заманауи технологияларды пайдалану және жабдықтарға қызмет көрсету бойынша біліктілігі арттырылады.
Мемлекет басшысы жобаны жүзеге асыру барысында ең алдымен халықты тұрақты, қауіпсіз әрі сапалы жылумен қамтамасыз етуге, сондай-ақ құрылыс жұмыстарын белгіленген мерзімде және жоғары сапада аяқтауға ерекше назар аударды.
Жоба барысын үйлестіру және барлық инфрақұрылымдық мәселелерді уақытылы шешу жөнінде жауапты тұлғаларға нақты тапсырмалар берілді.
Сондай-ақ Нөкіс қаласындағы осы тәжірибе негізінде алдағы уақытта Бұхара, Самарқанд, Үргеніш және Зарафшан қалаларындағы қазандықтарды когенерация және тригенерация технологиялары негізінде жаңғырту жөніндегі ұсыныстар да қаралды.
