Президент канал жағалауында жүзеге асырылып жатқан абаттандыру жұмыстарымен танысты
Президент Шавкат Мирзиёев Ташкент облысына жұмыс сапары барысында «Орта Шыршық» ауданындағы Қарасу каналы жағалауында жүзеге асырылып жатқан абаттандыру жұмыстарымен танысты.
Бүгінде республиканың барлық өңірлерінде өзен-көлдер мен каналдар жағалауын заманауи қоғамдық кеңістікке айналдыруға ерекше көңіл бөлініп келеді. Мұндай жобалар тұрғындардың жайлы демалуына мүмкіндік беріп қана қоймай, туризм мен қызмет көрсету саласын дамытып, өңірлердің экономикалық әлеуетін арттыруға да ықпал етеді.
Қазіргі таңда «Орта Шыршық» ауданындағы Қарасу каналының жағалауы осындай көрікті демалыс орындарының біріне айналып келеді. Өткен жылы басталған құрылыс жұмыстары аясында жалпы құны 32 миллиард сумнан асатын жоба жүзеге асырылып, канал жағалауының 9 шақырымдық бөлігі толық абаттандырылады.
Жоба екі кезең бойынша іске асырылуда. Алғашқы кезеңде «Тыныштық» және «Қарасу» махаллалары арасындағы 1,6 шақырымдық жағалау жаңартылды. Мұнда жаяу жүргіншілерге арналған заманауи жолақтар, субұрқақ, воркаут алаңдары, аквапарк және көпір астынан өтетін туннель салынды.
Сонымен қатар аумаққа сәндік ағаштар отырғызылып, демалуға арналған орындықтар, қоғамдық тамақтану және қызмет көрсету нысандары ашылды.
Жобаның келесі кезеңінде «Қарасу», «Роватак» және «Файзабад» махаллалары арқылы өтетін бөлікте ойын-сауық, демалыс және гастрономиялық көшелер бой көтереді. Сауда және қызмет көрсету нысандарының саны алтыға дейін ұлғайтылып, нәтижесінде 150 жаңа жұмыс орны ашылады.
