Президент Әндіжандағы мақта кластерінің қызметімен танысты
Президент Шавкат Мирзиёев «Агрокластер Олтинкул» кәсіпорнында Шыңжаң әдісімен мақта өсіру үдерісімен танысты.
Өзбекстанда ауыл шаруашылығын дамытуға, салаға озық технологияларды енгізуге, сондай-ақ ғылыми әзірлемелер мен жаңа тәсілдерді өндіріске енгізуге ерекше көңіл бөлініп келеді.
Мемлекет басшысының 2025 жылғы 9 желтоқсандағы мақта және астық шаруашылығында өнімділікті арттыруға қатысты қаулысы бұл бағыттағы жұмыстарды кеңейтуге маңызды құқықтық негіз болды.
Мақта шаруашылығында Шыңжаң әдісін қолдану өнімділікті едәуір арттырумен қатар, су, тыңайтқыш және басқа да ресурстарды үнемдеуге, мақтаны күтіп-баптауға жұмсалатын шығындарды азайтуға мүмкіндік береді.
«Агрокластер Олтинкул» кәсіпорнының жалпы егістік алқабы 850 гектарды құрайды. Оның 23 гектарында Шыңжаң әдісімен мақта өсіру жолға қойылған.
Шыңжаң технологиясы бойынша мақта тұқымы үлдірдің астына қос қатар егіліп, топырақтың ылғалы мен температурасын тұрақты сақтауға, тұқымның ерте әрі біркелкі өнуіне жағдай жасалады.
Тамшылатып суару және қоректендіру жүйесі арқылы су мен тыңайтқыш мақтаның тамырына тікелей жеткізіледі. Нәтижесінде артық шығынның алдын алып, суды 40 пайызға дейін, ал тыңайтқышты шамамен 30 пайызға үнемдеуге болады.
Дәстүрлі әдіспен бір гектар жерден орта есеппен 30-35 центнер мақта жиналса, Шыңжаң технологиясы қолданылған алқаптарда бұл көрсеткіш 60-70 центнерге дейін жетеді. Үлдір астында қалыптасатын қолайлы микроклиматтың арқасында өнімді дәстүрлі алқаптарға қарағанда 10-15 күн ертерек жинауға мүмкіндік бар.
Кәсіпорында агротехникалық жұмыстардың негізгі бөлігі агродрондардың көмегімен атқарылуда. Бұл арнайы техниканы пайдалану қажеттілігін және жанар-жағармай шығынын едәуір азайтуға мүмкіндік береді.
Мемлекет басшысына жобаның нәтижелері, экономикалық тиімділігі және аталған технологияны одан әрі кеңейту жоспарлары туралы ақпарат берілді.
