Портлар қамали АҚШ ва Эроннинг келишувига халақит берадими?
АҚШ Президенти Дональд Трамп Вашингтон ва Теҳрон ўртасидаги музокара яқин кунларда қайта тикланиши мумкинлигини билдирди. Унинг фикрича, гарчи аниқ сана ҳали белгиланмаган бўлса-да, учрашув Исломобод шаҳрида ўтказилиши эҳтимоли бор. Демак, портларга нисбатан жорий этилган қамалга қарамай, дипломатия йўли ҳали ёпилмаган.
Дастлабки музокара натижа бермагани вазиятни мураккаблаштирди. Сўнгра АҚШ Эрон портларига нисбатан қатъий чеклов жорий қилди. Афсуски, томонлар ўртасидаги ишонч ҳамон паст даражада. Ҳатто, вице-президент Жей Ди Вэнс ҳам зиддиятни қисқа вақтда ҳал этиш амри маҳол, дея очиқ тан олди.
Асосий келишмовчилик Ислом Республикасининг ядровий дастури туфайли шаклланган. Вашингтон узоқ муддатли чеклов талаб қилмоқда, Теҳрон эса қисқа муддатли тўхтатиш вариантини илгари сурган. Қолаверса, санкцияни бекор қилиш масаласи ҳам музокаранинг баҳсли нуқтаси бўлиб қолмоқда.
Шунга қарамай, норасмий мулоқот муайян даражада яқинлашувга олиб келгани айтилмоқда. Бу ҳолат нефть бозорида ҳам акс этиб, нарх баррель учун 100 доллардан пастга тушди. Демак, ҳатто чеклов шароитида ҳам сиёсий ечим излаш жараёни давом этяпти.
Мусулмон Зиё,
ЎзА
