Парагвайда банк дағдарысы салдарынан президент қызметінен кетті
Парагвайдағы «Ueno Bank» банкінің банктроттығы 3 миллионға жуық клиентті өз қаражатын пайдалану мүмкіндігінен айырды. Қаржылық жанжалдан кейін президент Сантьяго Пенья отставкаға кетті. Осыдан соң парламенттің төменгі палатасы оны импичмент тәртібімен қызметінен шеттетуді бірауыздан мақұлдады. Енді президент міндетін вице-президент Педро Альяна атқарады деп күтілуде.
Орталық банктің тексеруі барысында «Ueno Bank» қаржысының дұрыс есепке алынбағаны, сондай-ақ мекеме иелеріне қатысы бар компанияларға заң бұза отырып ірі көлемде несие берілгені анықталды. Қайта есептеу нәтижесінде банктің капиталы заңмен белгіленген ең төменгі мөлшердің жартысына дейін төмендеген. 2025 жылғы қыркүйекте бір күннің ішінде үш компанияға шамамен 39 миллион доллар несие бөлінген. Дағдарыс салдарынан клиенттер шоттары мен банк карталарын пайдалана алмай отыр, ал 7 мыңға жуық қызметкер жалақысын алмаған.
Бұл жағдай Пеньяның қаржы саласының өкілдерімен байланысын да күн тәртібіне шығарды. Ол өткен жылға дейін «Ueno»-мен байланысты компаниялардың бірінде үлеске ие болған. Ал банктің бұрынғы басшысы Карлос Карвальоны Орталық банк басшылығына тағайындаған. «Ueno» мемлекеттік ұйымдардан шамамен 800 миллион доллар қаржы тартқан. Бұл жағдай үкімет, банк және бақылаушы органдар арасындағы байланыстарға қатысты сұрақты көбейтіп отыр.
