Өзбекстан мен Қазақстан IT саласындағы ынтымақтастықты кеңейтеді
ӨР Цифрлық технологиялар министрі Шерзод Шерматов Қазақстанның Өзбекстандағы Төтенше және Өкілетті елшісі Ералы Тоғжановпен кездесті.
Кездесуде екі ел арасындағы IT саласындағы ынтымақтастықты кеңейту, стартаптарды қолдау және Орталық Азияны халықаралық технологиялық орталық ретінде дамыту мәселелері талқыланды.
Тараптар «IT Park Uzbekistan» мен Қазақстанның «Astana Hub IT» орталығы арасындағы ынтымақтастықты жаңа деңгейге көтерудің маңыздылығын атап өтті. Бұл ретте бәсекелестіктен гөрі тәжірибе алмасуға, мүмкіндіктерді біріктіруге және өзара тиімді жобаларды жүзеге асыруға басымдық беру қажеттігі айтылды.
Сондай-ақ екі елдің стартаптары мен IT-компанияларының бір-бірінің нарығына шығуына, бірлескен жобаларды жүзеге асыруына және халықаралық нарықтарға бірге шығуына қолайлы жағдай жасау мәселелері қаралды.
Кездесуде Орталық Азияны біртұтас өңірлік IT кеңістігі ретінде халықаралық деңгейде таныту, шетелдік инвесторлар мен ірі технологиялық компаниялардың назарын аймаққа аудару перспективалары да сөз болды.
Бұдан бөлек, цифрлық инфрақұрылым, жасанды интеллект, деректер орталықтары және инновациялық жобалар бағытындағы ынтымақтастықты дамыту мүмкіндіктері талқыланды.
Кездесу соңында Өзбекстан мен Қазақстанның IT экожүйелері арасындағы байланысты нығайту, бірлескен бастамаларды жүзеге асыру және Орталық Азияны халықаралық технологиялар мен инвестициялар үшін перспективалы орталыққа айналдырудың маңыздылығы атап өтілді.
