Ўзбекистоннинг халқаро захиралари кўпайди
Марказий банкнинг маълум қилишича, 2026 йил бошидан буён Ўзбекистоннинг халқаро захиралари барқарор ўсиш суръатини намойиш этмоқда. Жумладан, 1 январь ҳолатига 66,3 млрд. АҚШ долларини ташкил этган захиралар 1 мартга келиб 77,1 млрд. долларга етди. Бу кўрсаткич мамлакат тарихидаги энг юқори даража сифатида қайд этилди.
Мамлакатимиз захиралар ҳажмининг ўсишига асосан жаҳон бозорида олтин нархининг кескин қимматлашуви таъсир кўрсатган. Хусусан, 2026 йилнинг дастлабки икки ойида олтин нархи сезиларли даражада ошиб, умумий захиралар қийматини юқорига тортадиган асосий омилга айланди.
Марказий банк маълумотларига кўра, февраль ойининг ўзидаёқ захиралар қарийб 2 млрд. долларга ошган. Бу жараёнда олтин захираларининг қиймати 67 млрд. доллардан ортиқни ташкил этгани кузатилди. Шу билан бирга, олтиннинг физик ҳажми ҳам ўсиб, 13 миллион трой унциясидан ошди.
Захиралар таркибига назар ташланса, уларнинг асосий қисмини айнан олтин ташкил этаётгани кўринади. Хорижий валюта захиралари нисбатан камроқ улушга эга бўлиб, тахминан 8-9 млрд. доллар атрофида шаклланган. Шунингдек, хорижий қимматли қоғозлар ҳам муайян улушни ташкил этмоқда.
Қайд этилишича, захиралар ҳажмининг ошиши мамлакат иқтисодиёти учун муҳим “хавфсизлик ёстиғи” вазифасини бажаради. У ташқи иқтисодий хатарларни юмшатиш, ташқи савдо ва тўловлар барқарорлигини таъминлаш ҳамда миллий валютага бўлган ишончни мустаҳкамлашда муҳим аҳамият касб этади.
Шу билан бирга, захираларнинг ўсиши Ўзбекистоннинг халқаро молиявий майдондаги позициясини мустаҳкамлаб, инвесторлар учун ишончлилик даражасини ошираётгани таъкидланмоқда.
Ш.Маматуропова,
ЎзА
