O‘zbekistonda avtotransport vositalari soni 5 millionga yaqinlashdi

So‘nggi yillarda O‘zbekistonda aholining shaxsiy transport vositalariga bo‘lgan ehtiyoji sezilarli darajada ortmoqda. Iqtisodiy faollikning kengayishi, shahar va qishloqlar o‘rtasidagi qatnovlarning ko‘payishi, shuningdek, aholi turmush darajasining yaxshilanishi natijasida avtotransport vositalari soni yildan-yilga o‘sib bormoqda.

Bugungi kunda avtomobil nafaqat harakatlanish vositasi, balki oilaviy qulaylik, tadbirkorlik faoliyati va kundalik ehtiyojlarni qondirishning muhim omiliga aylangan.

Milliy statistika qo‘mitasining so‘nggi ma’lumotlari ham mamlakatda avtomobillashuv jarayoni jadal kechayotganini ko‘rsatadi. 2026-yil 1-aprel holatiga O‘zbekistonda jismoniy shaxslar nomida ro‘yxatdan o‘tgan avtotransport vositalari soni 4 million 903,1 mingtani tashkil etdi. Bu ko‘rsatkich mamlakat aholisining shaxsiy transportga bo‘lgan ehtiyoji va imkoniyatlari tobora ortib borayotganini ko‘rsatadi.

Tahlillarga ko‘ra, bir yil davomida aholiga tegishli avtotransport vositalari soni 344,6 mingtaga ko‘paygan. Bu esa mamlakatda avtomobil bozori faollashayotgani, aholi daromadlari va transport infratuzilmasining rivojlanishi bilan ham bog‘liq.

Ro‘yxatdan o‘tgan transport vositalarining asosiy qismini yengil avtomobillar tashkil etmoqda. Ularning ulushi umumiy transport vositalari sonining 92,8 foiziga teng bo‘lib, jami 4 million 552,3 mingta yengil avtomobil aholi tasarrufida.

Qolgan qismi quyidagicha taqsimlangan: yuk avtomobillari — 330,3 mingta, mikroavtobuslar — 7,5 ming, maxsus transport vositalari — 7,2 ming dona, avtobuslar — 5,8 mingtani tashkil etadi. Bu raqamlar aholi tomonidan asosan shaxsiy maqsadlarda foydalaniladigan yengil avtomobillarga talab yuqori ekanini tasdiqlaydi.

Qayd etilishicha, transport vositalari sonining ortishi aholi mobilligini ta’minlash, iqtisodiy faollikni kuchaytirish va hududlar o‘rtasidagi aloqalarni yaxshilashga xizmat qiladi. Shu bilan birga, avtomobillar sonining ko‘payishi yo‘l infratuzilmasini yanada takomillashtirish, yo‘l harakati xavfsizligini kuchaytirish va ekologik muammolarning oldini olish kabi vazifalarni ham dolzarb qilib qo‘ymoqda.

Ayniqsa, yirik shaharlarda transport oqimi yil sayin oshib borayotgani yangi yo‘llar qurish, jamoat transportini rivojlantirish hamda zamonaviy transport boshqaruv tizimlarini joriy etish zarurligini ko‘rsatmoqda.

Sh.Mamaturopova,

O‘zA