Ўзбекистон ва Словения: давлат аудити бўйича илғор тажриба ва амалиёт алмашинуви ривожлантирилади
Олий Мажлис Сенатига Словения Республикаси Аудит суди раиси Яна Ахчин ташриф буюрди.
Сенат раиси Танзила Норбоева билан учрашувда икки томонлама, шу жумладан, давлат молиявий назорати соҳасидаги ҳамкорликнинг долзарб масалалари кўриб чиқилди.
Ўзбекистон Республикаси Ҳисоб палатаси ва Словения Аудит суди ўртасидаги ҳамкорликни ривожлантириш, шунингдек, давлат аудити бўйича илғор тажриба ва амалиётларни алмашиш муҳимлиги таъкидланди.
Икки мамлакат ўртасидаги парламентлараро ҳамкорликка алоҳида эътибор қаратилди. Ўзбекистон Республикаси Олий Мажлиси Сенати ва Словения Республикаси Миллий кенгаши ўртасидаги ҳамкорлик тизимли ва конструктив характерга эга экани қайд этилди.
Парламент делегациялари ташрифларини фаоллаштириш, дастурлар ижроси устидан таъсирчан парламент назоратини кучайтириш ҳамда бу борада ўзаро тажриба алмашиш масалалари муҳокама қилинди.
Учрашув якунида томонлар барча йўналишларда амалий ҳамкорликни янада мустаҳкамлаш ва ривожлантиришдан ўзаро манфаатдор эканликларини билдирди.
Н.Абдураимова, ЎзА
