Озарбайжон Европа Кенгашини тарк этиши мумкин
Озарбайжон президенти Илҳом Алиев мамлакат Европа Кенгаши аъзолигидан тўлиқ чиқиш масаласи кўриб чиқилаётганини маълум қилди. Унинг айтишича, гап энди аъзоликни вақтинча тўхтатиш эмас, балки ташкилотни бутунлай тарк этиш ҳақида кетмоқда.
Давлат раҳбари бу қарорга Европа Кенгаши Парламент Ассамблеяси 2024 йилда Озарбайжон делегациясининг овоз бериш ҳуқуқини тўхтатгани сабаб бўлганини таъкидлади. Алиев бу қарорни “адолатсиз” деб атаб, делегация ҳуқуқлари тўлиқ тикланмагунча Боку ташкилот билан муносабатларни қайта кўриб чиқишини билдирди.
Унинг сўзларига кўра, Европа Кенгаши бош котиби Ален Берсе шахсан мурожаат қилиб, Озарбайжонни ташкилотда қолишга чақирган ва муносабатларни яхшилаш йўлларини излашни таклиф этган. Алиевнинг таъкидлашича, аввал адолатсиз қарор қайта кўриб чиқилиши ва хато тан олиниши лозим.
Шуша шаҳрида ўтказилган “Global Media Forum” анжуманида сўзга чиққан Озарбайжон етакчиси Яқин Шарқдаги вазиятга ҳам тўхталиб, можаролар халқаро ҳуқуқ асосида ва адолатли йўл билан ҳал этилиши кераклигини қайд этди. Унинг фикрича, минтақадаги барча томонлар кескинликни кучайтириш эмас, балки муносабатларни нормаллаштириш йўлини танлаши зарур.
Мусулмон Зиё, ЎзА
