Осиё чемпионати: Гандболчиларимиз бугун Саудия Арабистони билан ўйин ўтказади
Бугун, 29 август куни Иордания пойтахти Амман шаҳрида гандбол бўйича давом этаётган 11-Осиё чемпионатининг навбатдаги кун баҳсларида Ўзбекистон U-18 терма жамоаси 5–8-ўринлар йўлидаги илк учрашувни Саудия Арабистонига қарши ўтказади.
Кеча поёнига етган чорак финал ўйинида ҳамюртларимиз қитъанинг энг кучли жамоаларидан бири саналган Эрон терма жамоаси билан куч синашди.
Учрашувнинг биринчи ярмида Ўзбекистон U-18 терма жамоаси муносиб ўйин намойиш этиб, рақибга жиддий қаршилик кўрсатди. Баъзи вазиятларда очко ҳисобига олдинга ҳам ўтиб олди.
Бироқ, иккинчи бўлимда катта тажрибага эга Эрон жамоаси ўзига хос қаршилик ўйинини намойиш этди ва 36:24 ҳисобида устунликка эришиб, ярим финалга йўл олди.
Бугун, шунингдек, Иордания ва Қувайт жамоалари 5-8-ўринлар учун кечадиган баҳсларда рўбарў келади. Ушбу босқичда ғолиб чиққан жамоалар 5-6-ўрин учун, мағлуб бўлганлар эса 7-8-ўрин учун курашиш имкониятига эга бўлади.
Айтиш лозимки, бугун, 29 август куни Баҳрайн, Жанубий Корея, Қатар ва Эрон жамоалари ярим финал учрашувларида майдонга тушади.
Чемпионат 31 августга қадар давом этади.
Т.Рўзиев,
ЎзА
