Нодирбек Абдусатторов “FIDE freestyle” жаҳон чемпионати йўлланмасини қўлга киритди
Маҳоратли шахматчимиз Нодирбек Абдусатторов “FIDE freestyle” бўйича жаҳон чемпионатининг ягона йўлланмаси учун chess.com платформасида ўтказилган Play-In саралаш турнирида ғолибликни қўлга киритди.
Мазкур саралаш мусобақасининг 104 нафар шахматчи иштирокида ўтказилган илк босқичида 9 имкониятдан 7 очко жамғарган Абдусатторов 1-ўринни эгаллаганди.
Кеча ҳиндистонлик Пранав, АҚШлик Григорий Опарин, эронлик Амин Табатабаи иштирокида кечган якуний босқичда Нодирбек қуръа натижасига кўра, дастлаб эронлик Табатабаи билан рўбарў келди.
Икки партиядан иборат қарама-қаршиликнинг биринчи ўйинида дуранг қайд этилган бўлса, иккинчи партияда ҳамюртимиз устунликка эришди.
АҚШ шарафини ҳимоя қилган Опаринни доғда қолдирган Пранав билан жаҳон чемпионатининг ягона йўлланмаси учун ўтган учрашувда Нодирбек Абдусатторов рақибини 2:0 ҳисобида енгишга муваффақ бўлди ва Германиянинг Вайзенхаус шаҳрида ўтадиган “FIDE freestyle” бўйича жаҳон чемпионати йўлланмаси соҳиби бўлди.
Энди Абдусатторов жорий йил 13-15 февралда бўладиган чемпионатда Магнус Карлсен, Левон Aронян, Фабиано Каруана, Винсент Каймер, Aржун Еригаиси, Ханс Ниманн ва Жавоҳир Синдоров қаторида ушбу йўналишда ғолиблик учун кураш олиб боради.
Эслатиб ўтамиз, янгича тизимда ўтадиган “FIDE freestyle” жаҳон чемпионатининг умумий мукофот жамғармаси 300 минг АҚШ долларидан иборат бўлиб, чемпионликка эришган иштирокчи 100 минг АҚШ доллари билан тақдирланади.
Т.Рўзиев,
ЎзА
