Наманганда қўл жанги бўйича Президент кубоги мусобақаси ўтказилади
Жорий йилнинг 24 июль куни Наманган шаҳрининг Давлатобод туманидаги “Янги Ўзбекистон” боғида қўл жанги бўйича профессионал спортчилар ўртасида “Ўзбекистон Республикаси Президенти кубоги” чемпионлар лигаси халқаро турнири бўлиб ўтади.
Давлатимиз раҳбарининг 2022 йил 20 июндаги "Қўл жанги спорт турини янада ривожлантириш чора-тадбирлари тўғрисида"ги қарори ижроси доирасида Ўзбекистон ҳуқуқни муҳофаза қилиш органлари қўл жанги федерацияси, Миллий гвардия, республика Спорт вазирлиги, Наманган вилояти ҳокимлиги ҳамкорлигида еттинчи бор анъанавий равишда уюштирилаётган мазкур мусобақа олдидан Давлатобод туманидаги “Atour” меҳмонхонасида матбуот анжумани ҳамда вазн ўлчаш ва “Face to Face” маросимлари ўтказилди.
Халқаро қўл жанги федерацияси президенти Сергей Астаховнинг қайд этишича, Президент кубоги мусобақасининг бу сафарги мукофот фонди 41 минг 600 АҚШ долларни ташкил қилиб, унда мамлакатимиз спортчиларига Қозоғистон, Россия Федерацияси, Молдова, Туркия, Хитой Халқ Республикаси ва Руминия давлатларидан ташриф буюрган маҳоратли қўл жанги усталари рақиблик қилади.
[gallery-30531]
– Етти йилдан буён қўл жанги билан профессионал равишда шуғулланиб келаман. Ўтган даврда ўзимизда чемпионлик ва “ММА” бўйича чемпионат кумуш медалини қўлга киритганман, – дейди Хитойнинг Хенанг провинциясидан келган спортчи Чжен Юйзе. – Наманганга илк бор келишим. Бу мен учун тарихий аҳамиятга эга. Боиси, фаолиятимдаги биринчи хорижий турнирда ўзбекистонлик Ҳилола Ботирова билан баҳс олиб бориб, ғолибликни қўлга киритишга ҳаракат қиламан.
Дарвоқе, мусобақани нафақат маҳаллий спорт ихлосмандлари томоша қилишади, балки унга фахрий меҳмонлар сифатида халқаро турнирга ташриф буюрган спортчилар мамлакатларининг Ўзбекистондаги расмий дипломатик корпус вакиллари ҳам таклиф этилган.
Турнир “Sport” телеканали ҳамда Ютуб интернет платформаси орқали тўғридан-тўғри жонли эфирда намойиш этилади.
Оқилхон Дадабоев, Ҳотам Мамадалиев (сурат), ЎзА
