Мустақиллик тантаналари кўтаринки руҳда бўлиб ўтди
Ўзбекистон Республикаси давлат мустақиллигининг 35 йиллиги муносабати билан Жиззах вилоятида байрам тадбирлари юксак кўтаринкилик ва ўзига хос тантана руҳида бўлиб ўтди.
Айниқса, Жиззах шаҳридаги “Мустақиллик боғи” ҳудудида янгидан барпо этилган Амфитеатрда ўтаётган катта байрам концерти айёмга янада кўтаринки руҳ бағишлади. Замонавий қиёфа касб этган масканда жам бўлган юртдошлар қалбида Ватанга муҳаббат, истиқлолга шукроналик ва эртанги кунга ишонч туйғулари уйғунлашди.
Тадбирда Жиззахнинг истеъдодли санъаткорлари, хонандалар ва ижодий жамоалари фаол иштирок этиб, ўзларининг маҳоратли чиқишлари билан томошабинларга кўтаринки кайфият, завқ ва унутилмас таассурот улашди.
Мустақилликнинг 35 йиллигига бағишланган бу каби тантаналар нафақат эл-юртга байрамона кайфият бағишлади, балки миллий қадриятларимиз, бой маданий меросимиз ва санъатга бўлган юксак эътиборни яна бир бор намоён этди.
Абдужалол Қаюмов, ЎзА мухбири
