Микрокредитбанк "Junior Banking" орқали янги авлод мижозларини тайёрламоқда
Микрокредитбанк яқин йилларда тизимда жуда катта янгиликлар қилмоқда.
Пойтахтимиздаги Миллий матбуот марказида ўтказилган анжуманда сўнгги молиявий натижалар, янги кредит маҳсулотлари ва келгуси уч йилга мўлжалланган режаларини тақдим этди.
Маълум қилинишича, 2025 йил якунига кўра банкнинг активлари 30,7 триллион сўмга, кредит портфели 20,3 триллион сўмга, депозитлари эса 9,7 триллион сўмга етган. Шунингдек, хориждан 263 миллион АҚШ доллари миқдорида кредит линиялари жалб қилинган. Жорий йилнинг дастлабки олти ойида эса банк 6,8 триллион сўмлик кредит ажратди. Маблағларнинг асосий қисми кичик ва ўрта бизнес, оилавий тадбиркорлик, инвестиция лойиҳалари ҳамда “Менинг маҳаллам” дастурига йўналтирилган. Бу маблағлар ҳисобига 51 дан ортиқ лойиҳа ишга туширилиб, қарийб 100 мингга яқин киши иш билан таъминланган. Уларнинг 14 минг нафари доимий ишга жойлашган, 86 мингга яқини эса тадбиркорлик фаолиятини бошлаган.
[gallery-https://uza.uz/uz/collection/30778]
Банк фақат кредит ажратиш билангина чекланмаяпти. Энди тадбиркорлар сунъий интеллект ёрдамида тайёр бизнес-режа яратиши мумкин бўлади. Янги платформа ҳудудларнинг иқтисодий имкониятларини таҳлил қилиб, қайси бизнес йўналиши самаралироқ эканини тавсия қилади. Аҳоли учун ҳам бир нечта янгилик эълон қилинди. Эндиликда иккиламчи бозордан уй сотиб олиш учун ипотека кредитлари йиллик 21,55 фоиздан бошланади. Бирламчи бозордаги уй-жойлар учун эса ставка 17 фоизгача туширилган.
Автомобиль харид қилмоқчи бўлганлар учун ҳам янги имкониятлар яратилмоқда. Премиум русумдаги автомобиллар учун 2 миллиард 60 миллион сўмгача кредит олиш мумкин. Айрим автомобиллар учун эса автокредитлар 0 фоизлик бошланғич ставкадан таклиф этилмоқда.
Келгуси уч йил ичида Микрокредитбанк яна бир қатор янги хизматларни йўлга қўйишни режалаштирмоқда. Улар орасида исломий молиялаштириш, болалар ва ўсмирлар учун “Жуниор Банкинг” тизими, кредитларни сунъий интеллект ёрдамида баҳолаш ҳамда мижозларни Facе ID орқали тезкор аниқлаш тизимлари бор.
Дилдора Дўсматова
Ўктам Ҳайитов(сурат),
ЎзА
