“Meta” компанияси янги сунъий интеллект моделини тақдим этишга тайёрланмоқда

“Meta” компанияси вакили “Reuters” агентлигига берган баёнотида янги дастурлаш интерфейси (API) айни пайтда дастлабки ҳамкорлар билан синовдан ўтказилаётганини ва уни шу ойнинг ўзида оммавий фойдаланишга чиқариш режалаштирилганини таъкидлади.

Маълумот учун, API бу иккита турли дастурий тизимнинг ўзаро маълумот алмашиши ва ҳамкорликда ишлашини таъминловчи махсус интерфейсдир.

Жорий йилнинг апрель ойида “Meta AI” раҳбари Александр Ванг “X” (собиқ Twitter) тармоғидаги саҳифасида “Muse Spark API” тез орада тақдим этилади, дея эълон қилган эди. “Muse Spark” модели илк бор баҳорда намойиш этилган бўлиб, у компаниянинг “Superintelligence Labs” лабораторияси томонидан яратилган янги авлод моделларининг биринчиси ҳисобланади. Ушбу лойиҳа “Meta”нинг бозордаги асосий рақобатчилари билан ўртадаги технологик фарқни йўқотиш мақсадида ишлаб чиқилган.

Бундан ташқари, “Meta” компанияси бизнес жараёнларини ва кундалик вазифаларни бажаришни осонлаштиришга мўлжалланган янги сунъий интеллект агентини ҳам оммага кўрсатди. Бу қадам компаниянинг “OpenAI”, “Anthropic” ҳамда “Alphabet” (Google) каби йирик рақобатчилар билан жиддий кураш олиб бориш ниятида эканидан далолат беради.

Ф.Яхшибоева, ЎзА